शहादा, दि. ०२ (प्रतिनिधी) – नंदुरबार जिल्हा परिषदेच्या आरोग्य विभागातील अधिकारी संजय मोहिते यांची ‘बामसेफ’ (BAMCEF) या संघटनेच्या राष्ट्रीय अध्यक्षपदी निवड झाली आहे. या निवडीबद्दल त्यांच्यावर सर्वत्र अभिनंदनाचा वर्षाव होत असून, शहादा येथील पंचशील ग्रुपच्या वतीने त्यांचा विशेष सत्कार करण्यात आला.
या सत्कार समारंभास केंद्रप्रमुख नरेंद्र महिरे, संतोष कुवर, माजी मुख्याध्यापक नरेंद्र कुवर, पत्रकार बापू घोडराज, ग्रामसेवक प्रवीण खाडे, राजेंद्र आगळे, रमेश बर्डे, टेक्निशियन मिलिंद शिरसाट, मुख्याध्यापक शांतीलाल अहिरे, प्राध्यापक चंद्रविलास बिराडे, बेलगाव आरोग्य केंद्राचे पर्यवेक्षक तुकाराम बागले, पोलीस नाईक धनंजय पवार, वेडू सूर्यवंशी आणि पोलीस कॉन्स्टेबल मनोज सरदार आदी मान्यवर उपस्थित होते.
यावेळी बोलताना केंद्रप्रमुख नरेंद्र महिरे यांनी सांगितले की, बामसेफच्या राष्ट्रीय अध्यक्षपदी निवड होणे ही नंदुरबार जिल्ह्यासाठी अभिमानाची बाब आहे. हे पद मिळवण्यासाठी दीर्घकालीन कार्य, निष्ठा आणि संघटनेप्रती असलेली बांधिलकी महत्त्वाची ठरते.
तत्पूर्वी, नंदुरबार येथे धुळे-नंदुरबार जिल्हा परिषद तांत्रिक आरोग्य कर्मचारी सहकारी पतसंस्थेतर्फे आयोजित कार्यक्रमातही संजय मोहिते यांचा गौरव करण्यात आला.
सत्काराला उत्तर देताना संजय मोहिते म्हणाले की, “गेल्या ३५ वर्षांपासून मी बामसेफ संघटनेत निष्ठेने काम करत आहे. संघटनेचे ध्येयधोरण तळागाळापर्यंत पोहोचवून कार्यकर्त्यांचा विश्वास जिंकणे हे मोठे आव्हान असते. ही जबाबदारी स्वीकारून संघटना अधिक मजबूत करण्यासाठी मी प्रयत्नशील राहीन.”
या निवडीमुळे नंदुरबार जिल्ह्याच्या सामाजिक व संघटनात्मक क्षेत्रात अभिमानाचे वातावरण निर्माण झाले आहे.
