पनवेल/कामोठे प्रतिनिधी:
कामोठे येथील दिशा महिला मंचाने सामाजिक, सांस्कृतिक आणि शैक्षणिक क्षेत्रात १०० यशस्वी उपक्रम पूर्ण करत ऐतिहासिक टप्पा गाठला आहे. या निमित्ताने महाराष्ट्र दिनाच्या औचित्य साधून दि. ३० एप्रिल २०२६ रोजी कामोठे येथील राधाई स्कूलमध्ये “अस्मिता महाराष्ट्राची–२०२६” शताब्दी महोत्सव सोहळा मोठ्या उत्साहात पार पडला.
या दिमाखदार सोहळ्यात ‘रॉयल महाराष्ट्र रनवे’ आणि ‘रॉयल महाराष्ट्र गौरव सोहळा’चे आयोजन करण्यात आले होते. महाराष्ट्राच्या समृद्ध लोककला, परंपरा आणि ऐतिहासिक वैभवाचा सुरेख संगम या कार्यक्रमातून अनुभवायला मिळाला.
कार्यक्रमातील मुख्य आकर्षण ठरलेल्या ‘रॉयल महाराष्ट्र रनवे’मध्ये बालकलाकार व महिलांनी पारंपरिक महाराष्ट्रीयन पोशाख परिधान करून लोककलेचे बहारदार सादरीकरण केले. ऐतिहासिक वारसा आणि आधुनिक सादरीकरणाचा संगम या सोहळ्याचे वैशिष्ट्य ठरले.
या कार्यक्रमाचे उद्घाटन व पुरस्कार वितरण आमदार विक्रांतदादा पाटील, उपमहापौर प्रमिला पाटील, पोलीस निरीक्षक विमल बिडवे, इंदू झा तसेच अजित पोवळे यांच्या हस्ते करण्यात आले.
यावेळी बोलताना आमदार विक्रांतदादा पाटील यांनी दिशा व्यासपीठाच्या कार्याचे कौतुक करत, १०० उपक्रम पूर्ण करणे ही मोठी आणि प्रेरणादायी कामगिरी असल्याचे नमूद केले. समाजाप्रती असलेली बांधिलकी या माध्यमातून स्पष्ट होत असल्याचे त्यांनी सांगितले.
या प्रसंगी विविध क्षेत्रात योगदान देणाऱ्या मान्यवरांचा गौरव करण्यात आला. सामाजिक कार्यकर्ते, वैद्यकीय क्षेत्रातील व्यक्ती, महिला कार्यकर्त्या तसेच पत्रकार बांधवांचा सन्मान करण्यात आला.
संस्थेच्या संस्थापक अध्यक्षा निलम आंधळे यांच्यासह उपाध्यक्ष विद्या मोहिते यांचा विशेष सन्मान करण्यात आला. कार्यक्रमासाठी मोठ्या संख्येने महिला, नागरिक व मान्यवर उपस्थित होते.
कार्यक्रमादरम्यान निलम आंधळे यांनी आपल्या मनोगतात सांगितले की, हा सोहळा दिशा व्यासपीठाला योगदान देणाऱ्या सर्वांच्या सन्मानासाठी असून, सर्वांच्या सहकार्यामुळेच हा प्रवास यशस्वी झाला आहे.
