आजरा (जि. कोल्हापूर) : लोकशाहीर द. ना. गव्हाणकर यांच्या स्मृतीप्रित्यर्थ दिला जाणारा मानाचा “लोकशाहीर द. ना. गव्हाणकर स्मृती पुरस्कार २०२६” यंदा ज्येष्ठ विद्रोही शाहीर संभाजी भगत यांना प्रदान करण्यात आला. आजरा येथील मृत्युंजयकार शिवाजीराव सावंत स्मृती दालनात हा सोहळा उत्साहात पार पडला.
या पुरस्काराचे वितरण ज्येष्ठ विचारवंत व भाकपचे केंद्रीय नेते डॉ. भालचंद्र कांगो यांच्या हस्ते करण्यात आले. निमंत्रण पत्रिकेनुसार वैद्यकीय शिक्षणमंत्री हसन मुश्रीफ हे प्रमुख पाहुणे म्हणून अपेक्षित होते, मात्र काही कारणास्तव ते उपस्थित राहू शकले नाहीत.
कार्यक्रमाची सुरुवात द. ना. गव्हाणकर यांच्या प्रतिमेला पुष्पहार अर्पण करून अभिवादनाने झाली. पुरस्कार स्वीकृतीनंतर संभाजी भगत यांनी आपल्या दमदार शाहिरी शैलीत क्रांतिकारी गीत सादर करत उपस्थितांना मंत्रमुग्ध केले. त्यांच्या शाहिरीतून शोषित व वंचित घटकांच्या भावना प्रभावीपणे व्यक्त होत असल्याचे यावेळी अधोरेखित झाले.
विशेष म्हणजे, पुरस्कारासोबत मिळालेली १० हजार रुपयांची रक्कम त्यांनी सातारा येथे होणाऱ्या विद्रोही साहित्य संमेलनासाठी देणगी म्हणून समितीकडे सुपूर्द केली. त्यांच्या या सामाजिक बांधिलकीच्या कृतीचे उपस्थितांनी जोरदार टाळ्यांच्या गजरात स्वागत केले.
कार्यक्रमाच्या अध्यक्षस्थानी समितीचे अध्यक्ष मुकुंददादा देसाई होते. यावेळी कार्याध्यक्ष कॉ. संपत देसाई, खजिनदार सुनिल पाटील, उपाध्यक्ष मोहनराव देसाई, तसेच विविध क्षेत्रातील मान्यवर, साहित्यिक, सामाजिक कार्यकर्ते आणि पत्रकार मोठ्या संख्येने उपस्थित होते.
कार्यक्रमाचे प्रास्ताविक युवराज पवार यांनी केले, स्वागत कॉ. संपत देसाई यांनी केले तर आभार प्रदर्शन संजय घाटगे यांनी मानले.
लोकशाहीर द. ना. गव्हाणकर यांची क्रांतिकारी परंपरा आणि संभाजी भगत यांचा आवाज यांचा संगम या सोहळ्यात अनुभवायला मिळाला.
