(प्रतिनिधी) : नागापूर येथील झाशीची राणी लक्ष्मीबाई सामाजिक प्रतिष्ठान यांच्या वतीने सन २०२६ चा “समाजभूषण पुरस्कार” प्रा. सुंदर सिताराम बनसोडे यांना प्रदान करण्यात येणार असल्याची माहिती प्रतिष्ठानचे अध्यक्ष तथा भारतीय दलित पॅंथरचे परळी तालुका अध्यक्ष माणिकराव बनसोडे यांनी दिली.
हा पुरस्कार सामाजिक व शैक्षणिक क्षेत्रात उल्लेखनीय कार्य करणाऱ्या व्यक्तींना दिला जातो. प्रा. सुंदर बनसोडे (एम.ए. इंग्रजी, बी.एड.) हे २०१४ पासून पेन एज्युकेशन सोसायटी, पेन येथे अध्यापन करत असून त्यांनी शिक्षणाबरोबरच सामाजिक बांधिलकी जपत गरजू व आर्थिकदृष्ट्या दुर्बल विद्यार्थ्यांना शैक्षणिक मदत, साहित्य वाटप आदी उपक्रम राबवले आहेत. विद्यार्थ्यांच्या सर्वांगीण विकासासाठी ते सातत्याने कार्यरत असल्याने त्यांच्या कार्याची दखल घेऊन त्यांची या पुरस्कारासाठी निवड करण्यात आली आहे.
हा पुरस्कार सोहळा नागापूर येथे भीम जयंती उत्सवानिमित्त आयोजित करण्यात येणार असून धम्मचक्र मित्र मंडळ व जयंती उत्सव समिती यांच्या वतीने कार्यक्रमाचे आयोजन करण्यात आले आहे. प्रा. बनसोडे यांच्या वाढदिवसानिमित्त त्यांना हा सन्मान प्रदान केला जाणार आहे.
या सोहळ्यास सामाजिक, राजकीय, शैक्षणिक, वैद्यकीय, पत्रकारिता, क्रीडा क्षेत्रातील मान्यवरांसह नागापूर परिसरातील नागरिकांनी मोठ्या संख्येने उपस्थित राहावे, असे आवाहन जयंती उत्सव समितीचे अध्यक्ष बाबासाहेब बनसोडे, उपाध्यक्ष प्रवीण बनसोडे व प्रतिष्ठानच्या वतीने करण्यात आले आहे.
