शहादा, दि. 03 (प्रतिनिधी):
शहादा शहरासह परिसरात सध्या बर्ड फ्लू बाबत मोठी चर्चा सुरू असून पोल्ट्री फार्ममधील कोंबड्यांच्या मृत्यूमुळे नागरिकांमध्ये भीतीचे वातावरण निर्माण झाले आहे. या परिस्थितीचा थेट परिणाम चिकन विक्रीवर झाला असून, ग्राहकांनी मांसाहाराकडे पाठ फिरवल्याने विक्रेत्यांच्या दुकानांवर शुकशुकाट दिसून येत आहे.
शहरातील काही पोल्ट्री फार्ममध्ये कोंबड्या मोठ्या प्रमाणात दगावत असल्याच्या बातम्या वेगाने पसरल्या आहेत. त्यामुळे चिकन खरेदी करण्याबाबत नागरिक साशंक झाले असून अनेकांनी सध्या चिकन खाणे टाळल्याचे चित्र आहे. काही दिवसांपूर्वी गर्दीने फुललेली दुकाने आता ओस पडलेली दिसत आहेत.
या पार्श्वभूमीवर काही वर्षांपूर्वी नवापूर तालुक्यात झालेल्या बर्ड फ्लूच्या प्रादुर्भावाची आठवण नागरिकांना झाली आहे. त्या काळात मोठ्या प्रमाणात कोंबड्यांचा बळी गेला होता. त्यामुळे पुन्हा तशीच परिस्थिती निर्माण होण्याची भीती व्यक्त होत आहे.
सध्याच्या परिस्थितीची गंभीर दखल घेत जिल्हा प्रशासन व आरोग्य विभागाने तातडीने उपाययोजना कराव्यात, अशी मागणी होत आहे. चिकन विक्री करणाऱ्या दुकानांमधील कोंबड्यांचा स्रोत, त्यांची वैद्यकीय तपासणी आणि स्वच्छतेचे नियम याबाबत कठोर तपासणी करण्याची गरज व्यक्त केली जात आहे. विशेषतः आजारी किंवा मृत कोंबड्यांची विक्री होत नाही ना, याकडे प्रशासनाने लक्ष देणे आवश्यक आहे.
नागरिकांनीही सतर्क राहून स्वच्छतेचे नियम पाळावेत आणि अफवांवर विश्वास न ठेवता अधिकृत माहितीवर भर द्यावा, असे आवाहन करण्यात येत आहे.
