जळगाव (प्रतिनिधी) : जळगाव जिल्ह्यातील एका खासगी कंपनीत महिला कर्मचाऱ्याच्या लैंगिक छळाची धक्कादायक घटना समोर आली आहे. कंपनीतील वरिष्ठ अधिकाऱ्याने अश्लील मागणी करत दबाव टाकल्याचा आरोप करण्यात आला आहे.
पीडित महिलेच्या तक्रारीनुसार, संबंधित अधिकाऱ्याने “तू मला खुश कर, मी तुला दहा दिवस सुट्टी देतो” असे म्हणत तिच्यावर अनुचित मागणी केली. महिलेने या मागणीस नकार दिल्यानंतर आरोपीने तिच्यावर जबरदस्ती करण्याचा प्रयत्न केला तसेच धमक्या दिल्याचे तक्रारीत नमूद आहे.
यामध्ये कुटुंबाला इजा पोहोचवण्याची तसेच व्हिडिओ व्हायरल करण्याची धमकी दिल्याचाही आरोप करण्यात आला आहे. या प्रकरणी धरणगाव पोलीस ठाण्यात गुन्हा दाखल करण्यात आला असून आरोपी सध्या फरार आहे. पोलिसांकडून त्याचा शोध सुरू आहे.
या घटनेमुळे कार्यस्थळी महिलांच्या सुरक्षिततेचा प्रश्न पुन्हा ऐरणीवर आला असून संबंधित प्रकरणाची सखोल चौकशी करण्याची मागणी होत आहे.
