माजलगाव (प्रतिनिधी) : महसूल व वन विभागाच्या वतीने महसूल मंडळ मंजरथ आयोजित छत्रपती शिवाजी महाराज महसूल समाधान शिबीर अभियान (टप्पा क्र. १) दि. ३० एप्रिल २०२६ रोजी जि.प. प्राथमिक शाळा, मंजरथ येथे उत्साहात पार पडले. या शिबिरात नागरिकांना विविध शासकीय सेवा एकाच ठिकाणी तत्काळ उपलब्ध करून देण्यात आल्या.
कार्यक्रमाच्या अध्यक्षस्थानी आमदार प्रकाशदादा सोळंके होते. प्रमुख अतिथी म्हणून जिल्हाधिकारी विवेक जॉन्सन, मुख्य कार्यकारी अधिकारी जितीन रहेमान, अपर जिल्हाधिकारी अश्विनी जिरंगे उपस्थित होते. तसेच उपविभागीय अधिकारी गौरव इंगोले, तहसीलदार संतोष रुईकर, गटविकास अधिकारी ज्योत्सना मुळीक, तालुका कृषी अधिकारी गणेश बादाडे, तालुका आरोग्य अधिकारी मधुकर घुबडे, तसेच भूमी अभिलेख विभागाचे अधिकारी आदींची विशेष उपस्थिती होती.
या शिबिरात नागरिकांना विविध सेवा पुरविण्यात आल्या. त्यामध्ये जातीचे अर्ज स्वीकारणे व प्रमाणपत्र वाटप, रहिवासी व उत्पन्न प्रमाणपत्र देणे, ७/१२ उतारे वितरण, फेरफार प्रकरणे निकाली काढणे, अभिलेख दुरुस्ती, रस्त्यांच्या नोंदी अद्ययावत करणे यांसारख्या महसूल संबंधित सेवा देण्यात आल्या.
तसेच मोफत आरोग्य तपासणी शिबीर, आधार व ई-केवायसी कॅम्प, ई-शिधापत्रिका वाटप, अॅग्रीस्टॅक योजना, पीएम किसान योजनेबाबत मार्गदर्शन, एनसीएमसी स्मार्ट कार्ड सुविधा यांचाही लाभ नागरिकांनी घेतला. विविध अर्थसाह्य योजना, पशुसंवर्धन, कृषी व पंचायत समिती विभागांच्या योजनांबाबत माहिती देण्यात आली.
विशेष म्हणजे पात्र घरकुल लाभार्थ्यांना ५ ब्रास वाळू मोफत देण्याची सुविधा देखील उपलब्ध करून देण्यात आली.
या शिबिरामुळे नागरिकांची कामे तात्काळ मार्गी लागली असून ग्रामस्थांनी समाधान व्यक्त केले. विविध विभागांच्या समन्वयातून आयोजित या उपक्रमाला नागरिकांचा उत्स्फूर्त प्रतिसाद मिळाला.
