परळी (प्रतिनिधी) : नागापूर गावचे भूमिपुत्र तथा ग्रामपंचायत सदस्य मा. विकास भैय्या बनसोडे यांचा वाढदिवस यंदा एक आगळ्या-वेगळ्या सामाजिक उपक्रमातून साजरा करण्यात आला. वाढदिवसाच्या निमित्ताने रुग्णांना रक्तदान कार्ड वाटप करून समाजोपयोगी संदेश देण्यात आला.
सामाजिक क्षेत्रात सतत सक्रिय राहणारे व फुले-शाहू-आंबेडकर विचारसरणीवर चालणारे व्यक्तिमत्व म्हणून त्यांची ओळख आहे. सर्वसामान्यांच्या मदतीसाठी सदैव पुढे धावून जाणारे विकास बनसोडे यांनी नागापूर ग्रामपंचायत सदस्य म्हणूनही उल्लेखनीय कार्य केले आहे.
या प्रसंगी मित्रपरिवार, ग्रामस्थ तसेच विविध सामाजिक व राजकीय क्षेत्रातील मान्यवर मोठ्या संख्येने उपस्थित होते. “गावातील प्रत्येक घटकापर्यंत मदत पोहोचवणे आणि सामाजिक बांधिलकी जपणे” हेच त्यांचे कार्यमूल्य असल्याचे यावेळी व्यक्त करण्यात आले.
या कार्यक्रमात झाशीची राणी लक्ष्मीबाई सामाजिक प्रतिष्ठान तसेच भारतीय दलित पँथर महाराष्ट्र राज्यचे अध्यक्ष माणिकराव बनसोडे यांनी दूरध्वनीद्वारे शुभेच्छा देत त्यांच्या कार्याचे कौतुक केले. यावेळी त्यांनी पुढील काळातही समाजहिताची कामे अधिक जोमाने करण्याचा संदेश दिला.
विशेष म्हणजे वाढदिवसाच्या दिवशीही विकास बनसोडे हे अंबाजोगाई येथील रुग्णालयात जाऊन रक्तदान कार्ड उपक्रमात सहभागी झाले होते. त्यांच्या या कार्यामुळे सर्वत्र त्यांचे कौतुक होत असून “खऱ्या अर्थाने सामाजिक कार्यकर्ता” अशी ओळख अधिक बळकट झाली आहे.
गावातील नागरिक, मित्रपरिवार आणि विविध क्षेत्रातील मान्यवरांकडून त्यांना वाढदिवसानिमित्त शुभेच्छांचा वर्षाव करण्यात आला.
