वर्धा (प्रतिनिधी) : वर्धा शहर पोलिसांनी अवैध दारू तस्करीविरुद्ध मोठी धडक कारवाई करत पहाटेच्या सुमारास नागसेन नगर, नालवाडी परिसरात १५ लाखांहून अधिक किंमतीचा मुद्देमाल जप्त केला आहे. या कारवाईमुळे परिसरात एकच खळबळ उडाली आहे.
पोलीस उपनिरीक्षक विशाल सवाई यांना मिळालेल्या गोपनीय माहितीनुसार दोन पांढऱ्या रंगाच्या स्विफ्ट कारमधून मोठ्या प्रमाणात विदेशी दारूची वाहतूक होणार होती. माहिती मिळताच पोलीस निरीक्षक संतोष ताले यांच्या मार्गदर्शनाखाली पोलिसांनी तत्काळ नाकेबंदी केली.
पहाटे सुमारे ४ वाजता संशयित वाहने दिसताच पोलिसांनी त्यांना थांबवण्याचा प्रयत्न केला. मात्र, चालकांनी पळून जाण्याचा प्रयत्न केला. पोलिसांनी पाठलाग करून दोन्ही कार अडवून ताब्यात घेतल्या.
झडतीदरम्यान ३१ पेट्या विदेशी दारू (ऑफिसर चॉईस, बॉम्बे व्हिस्की, मॅजिक मोमेंट व्होडका, बडवायझर बिअर) जप्त करण्यात आली. यासोबत दोन स्विफ्ट कारही जप्त करण्यात आल्या. एकूण मुद्देमालाची किंमत सुमारे १५ लाख ३४ हजार रुपये आहे.
या प्रकरणी सुमीत मनोज पाला (२५), गणेश विजय भाट (२१) आणि प्रद्युम राजन सेन (२६) या तिघांना अटक करण्यात आली आहे. प्राथमिक चौकशीत ही दारू मध्य प्रदेशातील सालबर्डी येथून आणल्याचे समोर आले आहे.
आरोपींविरुद्ध महाराष्ट्र दारूबंदी कायदा व मोटार वाहन कायद्यांतर्गत गुन्हा दाखल करण्यात आला आहे.
ही कारवाई पोलीस अधीक्षक सौरव कुमार अग्रवाल, अपर पोलीस अधीक्षक सदाशिव वाघमारे आणि उपविभागीय पोलीस अधिकारी प्रमोद मकेश्वर यांच्या मार्गदर्शनाखाली पार पडली. या यशस्वी कारवाईमुळे शहर पोलिसांचे नागरिकांकडून कौतुक केले जात आहे.
