बीड (प्रतिनिधी) : पुणे जिल्ह्यातील भोर तालुक्यातील नसरापूर येथे चार वर्षांच्या बालिकेवर झालेल्या अत्याचाराच्या घटनेचा तीव्र निषेध करत आरोपीला फाशीची शिक्षा देण्याची मागणी बीडमध्ये करण्यात आली आहे.
या प्रकरणी परशुराम हिंदू सेवा संघ, बीड तसेच शहरातील समाजशील नागरिकांच्या वतीने जिल्हाधिकारी कार्यालयात निवेदन सादर करण्यात आले. मंगळवारी सकाळी ११ वाजता मोठ्या संख्येने नागरिक जिल्हाधिकारी कार्यालयासमोर एकत्र आले.
निवेदनात समाजात वाढत असलेल्या बाल अत्याचाराच्या घटनांबाबत तीव्र चिंता व्यक्त करण्यात आली. पोलिसांचा धाक कमी झाल्याने अशा घटना वाढत असल्याचा आरोपही करण्यात आला आहे. अशा नराधमांना कठोर शिक्षा झाली पाहिजे, जेणेकरून भविष्यात कोणीही असे कृत्य करण्याची हिंमत करणार नाही, अशी मागणी करण्यात आली.
या घटनेमुळे समाजात संतापाची लाट उसळली असून पालकांमध्ये भीतीचे वातावरण निर्माण झाले आहे. भविष्यात अशा घटना रोखण्यासाठी कठोर कायदे व तात्काळ न्यायप्रक्रिया राबवण्याची मागणीही करण्यात आली.
यावेळी उपस्थित नागरिकांनी समाजातील सर्व संघटनांनी एकत्र येऊन अशा घटनांविरोधात रस्त्यावर उतरून लढा देण्याची भूमिका घेतली आहे.
