पाथरी (प्रतिनिधी) : पाथरी येथील पंचायत समिती सभागृहात आमदार राजेश दादा विटेकर यांच्या उपस्थितीत 4 मे रोजी जनता दरबार उत्साहात पार पडला. या दरबारात तालुक्यातील विविध भागांतील नागरिकांनी आपल्या समस्या व अडचणी मांडल्या.
कार्यक्रमादरम्यान उपस्थित शासकीय अधिकाऱ्यांनी अनेक प्रश्नांना तत्काळ उत्तरे देत काही समस्या जागेवरच मार्गी लावल्या. काही विभागांचे अधिकारी अनुपस्थित असल्याने आमदार विटेकर यांनी संबंधित अधिकाऱ्यांना दूरध्वनीद्वारे संपर्क साधून नागरिकांचे प्रश्न तातडीने सोडविण्याचे स्पष्ट निर्देश दिले.
यावेळी बोलताना आमदार विटेकर म्हणाले की, “जनतेच्या समस्या जाणून घेऊन त्यांचे त्वरित निराकरण करणे ही आमची प्राथमिकता आहे. पुढील काळातही असे जनता दरबार नियमितपणे घेऊन सर्वसामान्यांच्या अडचणी सोडवल्या जातील.”
या कार्यक्रमास जि. प. सदस्य अरुणराव कोल्हे, मदनराव भोसले, सभापती सुनीता डुकरे, उपसभापती सचिन अंबुरे, पंचायत समिती सदस्य भगवान दुगाणे, किशन घांडगे, माजी सभापती अनिलराव नखाते, संजय रणेर, अविराज टाकळकर, राजेश ढगे, बंटी पाटील तसेच गट विकास अधिकारी शैलेश वाव्हळे, तालुका कृषी अधिकारी गोविंद कोल्हे, आरोग्य अधिकारी पुजारी व इतर अधिकारी आणि मोठ्या संख्येने नागरिक उपस्थित होते.
कार्यक्रमाचे सूत्रसंचालन व आभार प्रदर्शन विस्तार अधिकारी (कृषी) संदीपान घुंबरे यांनी केले.
