कन्नड (प्रतिनिधी) : कन्नड शहराच्या विकासाला गती देण्यासाठी प्रभाग क्रमांक १, ५, ६ आणि ९ मध्ये विविध विकासकामांचा शुभारंभ करण्यात आला. सुमारे २ कोटी ५० लाख रुपयांच्या या विकासकामांचे भूमिपूजन आमदार संजना जाधव यांच्या हस्ते उत्साहात पार पडले.
या कामांमध्ये प्रामुख्याने रस्ते बांधणी, नाली बांधकाम आणि इतर मूलभूत सुविधांचा समावेश असून, संबंधित प्रभागांतील नागरिकांना दीर्घकाळ प्रलंबित असलेल्या समस्यांपासून दिलासा मिळणार आहे.
कार्यक्रमाचे विशेष आकर्षण म्हणजे नवनिर्वाचित नगराध्यक्षा सौ. फरिन बेगम अब्दुल वाजेद यांची उपस्थिती. पदभार स्वीकारल्यानंतर शहर विकासासाठी त्यांनी दाखवलेली तत्परता नागरिकांमध्ये चर्चेचा विषय ठरली आहे. मुख्याधिकारी श्री. रवींद्र लांडे यांनी कामांच्या तांत्रिक बाबी व गुणवत्तेबाबत माहिती दिली.
कार्यक्रमाला स्थानिक नगरसेवक, विविध पक्षांचे पदाधिकारी तसेच मोठ्या संख्येने नागरिक उपस्थित होते. यावेळी आमदार संजना जाधव यांनी सांगितले की, “कन्नड शहराचा विकास हा आमचा प्राधान्यक्रम असून, दर्जेदार व वेळेत कामे पूर्ण करण्यासाठी प्रशासन कटिबद्ध आहे.”
या विकासकामांचे नागरिकांनी स्वागत केले असून, लोकप्रतिनिधी व प्रशासनाचे आभार मानण्यात आले आहेत.
