इंदापूर (प्रतिनिधी) : कळंब (ता. इंदापूर) येथील इंदापूर तालुका ग्रामविकास प्रतिष्ठान संचालित विश्वासराव रणसिंग महाविद्यालयातील विद्यार्थिनी अहिल्या शत्रुघ्न शिंदे हिने कुस्ती क्षेत्रात उल्लेखनीय यश संपादन करत आंतरराष्ट्रीय स्तरावर झेप घेतली आहे. भारतीय कुस्ती महासंघातर्फे आयोजित निवड चाचणीत उत्कृष्ट कामगिरी करत तिची आंतरराष्ट्रीय स्पर्धेसाठी निवड झाली आहे.
दिल्ली येथे नुकत्याच पार पडलेल्या निवड चाचणीत अहिल्याने ५५ किलो वजनी गटात सहभागी होत अनेक नामांकित खेळाडूंना पराभूत केले. तिच्या या दमदार कामगिरीमुळे तिने आंतरराष्ट्रीय स्तरावर आपली दावेदारी सिद्ध केली आहे.
दि. २३ मे ते ३१ मे दरम्यान व्हिएतनाम येथे होणाऱ्या २३ वर्षाखालील आशियाई कुस्ती स्पर्धेत ती भारताचे प्रतिनिधित्व करणार आहे. या निवडीमुळे महाविद्यालयाच्या क्रीडा क्षेत्रात अभिमानास्पद कामगिरीची नोंद झाली असून, आंतरराष्ट्रीय स्तरावर निवड होणारी अहिल्या ही महाविद्यालयाची पहिलीच खेळाडू ठरली आहे.
या यशाबद्दल इंदापूर तालुका ग्रामविकास प्रतिष्ठानच्या अध्यक्षा आनंदी रणसिंग, उपाध्यक्ष प्रकाश कदम, सचिव विरसिंह रणसिंग, खजिनदार वीरबाला पाटील, विश्वस्त कुलदीप हेगडे, राही रणसिंग, शंकरराव रणसिंग तसेच महाविद्यालयाचे प्राचार्य डॉ. अशोक काळंगे व शारीरिक शिक्षण संचालक डॉ. सुहास भैरट यांनी अहिल्याचे अभिनंदन करून पुढील वाटचालीस शुभेच्छा दिल्या आहेत.
