शिरूर (प्रतिनिधी) : पुणे जिल्ह्यातील गणेगाव खालसा (ता. शिरूर) येथे मा. रसिकभाऊ धारिवाल माध्यमिक विद्यालयाच्या प्रांगणात किस्किंदा गुरुकुल व राष्ट्रवीर संघ, पुणे यांच्या संयुक्त विद्यमाने लाठी-काठी प्रशिक्षण, शिवकालीन युद्धकला व स्वसंरक्षण प्रशिक्षण शिबिराचे आयोजन करण्यात आले आहे.
हे प्रशिक्षण शिबिर दि. ३ मे ते ९ मे दरम्यान दररोज सायंकाळी ५ ते ७ या वेळेत आयोजित करण्यात आले असून, सर्व वयोगटातील नागरिक उत्स्फूर्तपणे सहभागी होत आहेत. या शिबिरासाठी प्रशिक्षक म्हणून सौ. पूजा नितीन शेलार मार्गदर्शन करत आहेत.
विशेष म्हणजे, हे प्रशिक्षण केवळ गणेगाव खालसा पुरते मर्यादित न राहता परिसरातील सुमारे १५ गावांमध्ये आयोजित करण्यात येत आहे. शिबिराच्या माध्यमातून नागरिकांना स्वसंरक्षणाचे कौशल्य आत्मसात करता येणार असून, त्याचबरोबर शारीरिक तंदुरुस्ती व आरोग्य सुधारण्यासही मदत होणार आहे.
या उपक्रमामागील मुख्य उद्देश म्हणजे सर्वसामान्यांमध्ये आत्मविश्वास वाढवणे, पारंपरिक शिवकालीन युद्धकलेचे संवर्धन करणे आणि प्रत्येक व्यक्तीला स्वतःचे संरक्षण करता यावे हा आहे.
