मुरबाड (प्रतिनिधी)
मुरबाडजवळील माळशेज घाट महामार्गावर वैशाखरे वळणाजवळ एसटी बस आणि स्कॉर्पिओ कारची समोरासमोर जोरदार धडक होऊन भीषण अपघात झाला. या दुर्घटनेत ३ जणांचा मृत्यू झाला असून ५ जण गंभीर जखमी झाले आहेत.
मृतांमध्ये २ पुरुष व १ महिलेचा समावेश असून, एका लहान मुलासह पाच जण जखमी झाले आहेत. जखमींना तात्काळ टोकावडे येथील ग्रामीण रुग्णालयात दाखल करण्यात आले असून त्यांच्यावर उपचार सुरू आहेत. काही जखमींची प्रकृती गंभीर असल्याने मृतांचा आकडा वाढण्याची भीती व्यक्त केली जात आहे.
प्राथमिक माहितीनुसार, कल्याण-अहिल्यानगर महामार्गावरील वैशाखरे वळणाजवळ ओव्हरटेक करण्याच्या प्रयत्नात हा अपघात झाला. आज सकाळी कल्याणहून अहिल्यानगरकडे जाणारी एसटी बस व समोरून येणारी स्कॉर्पिओ यांच्यात जोरदार धडक झाली. धडक इतकी भीषण होती की दोन्ही वाहनांच्या पुढील भागाचा अक्षरशः चुराडा झाला.
अपघातानंतर स्थानिक नागरिकांनी तत्काळ घटनास्थळी धाव घेत जखमींना वाहनातून बाहेर काढून रुग्णालयात हलवले. घटनेची माहिती मिळताच टोकावडे महामार्ग पोलिसांनी घटनास्थळी पोहोचून मदतकार्य सुरू केले व अपघातग्रस्त वाहने बाजूला करत वाहतूक सुरळीत केली.
या अपघातामुळे काही काळ वाहतूक विस्कळीत झाली होती. पोलिसांनी या प्रकरणी गुन्हा दाखल केला असून पुढील तपास सुरू आहे.
