बिलोली (प्रतिनिधी)
बिलोली उपजिल्हा ग्रामीण रुग्णालयातील काही वैद्यकीय अधिकारी व कर्मचाऱ्यांकडून शासनाच्या नियमांचे उल्लंघन होत असल्याचा आरोप करत त्यांचे वेतन रोखण्याची मागणी सामाजिक कार्यकर्ते लक्ष्मीकांत कलमुर्गे यांनी केली आहे.
कलमुर्गे यांच्या म्हणण्यानुसार, अनेक डॉक्टर ‘नॉन-प्रॅक्टिसिंग अलाउन्स’ (NPA) अर्थात व्यवसायरोध भत्ता घेत असतानाही खाजगी वैद्यकीय व्यवसाय करत आहेत. हा भत्ता केवळ खाजगी प्रॅक्टिस न करणाऱ्या डॉक्टरांसाठी असताना, नियम धाब्यावर बसवून त्याचा गैरवापर केला जात असल्याचा आरोप त्यांनी केला आहे.
तसेच, शासनाच्या नियमानुसार घरभाडे भत्ता (HRA) मिळवण्यासाठी कर्मचारी मुख्यालयी राहणे आवश्यक आहे. मात्र, काही कर्मचारी व अधिकारी मुख्यालयी किंवा शासकीय क्वार्टरमध्ये राहत नसतानाही घरभाडे भत्ता घेत असल्याचे निदर्शनास येत असल्याचे त्यांनी नमूद केले.
याशिवाय, काही डॉक्टर नांदेड, मुखेड, नायगाव, धर्माबाद तसेच तेलंगणातील निजामाबाद येथे खाजगी दवाखाने चालवत असल्याचा आरोप करण्यात आला आहे. काही वैद्यकीय अधिकारी आठवड्यातून केवळ एक-दोन वेळाच रुग्णालयात उपस्थित राहतात, असेही सांगण्यात आले.
या सर्व प्रकारांची सखोल चौकशी करून दोषींवर कठोर कारवाई करावी, तसेच नियमांचे उल्लंघन करणाऱ्या डॉक्टर व कर्मचाऱ्यांचे वेतन रोखण्यात यावे, अशी मागणी करण्यात आली आहे.
दरम्यान, नव्याने रुजू झालेल्या वैद्यकीय अधीक्षकांनी या प्रकरणाकडे गांभीर्याने लक्ष देऊन योग्य ती कार्यवाही करावी, अशी अपेक्षा व्यक्त होत आहे.
