निफाड (प्रतिनिधी) – निफाड नगरपरिषद हद्दीत जनगणना २०२७ या राष्ट्रीय महत्त्वाच्या उपक्रमास प्रारंभ झाला असून, यंदा ही जनगणना अत्याधुनिक व डिजिटल पद्धतीने राबविण्यात येत आहे. नागरिकांनी सक्रिय सहभाग नोंदवून शहराच्या विकासात हातभार लावावा, असे आवाहन नगरसेवक जावेद शेख यांनी केले आहे.
नगरसेवक जावेद शेख यांनी सांगितले की, जनगणना ही केवळ लोकसंख्या मोजणी नसून शहराच्या भविष्यातील विकास आराखड्याचा आधारस्तंभ आहे. केंद्र व राज्य शासनाकडून मिळणारा निधी, पायाभूत सुविधा, आरोग्य व शिक्षणाच्या विविध योजना यांचे अचूक नियोजन जनगणनेतील माहितीवर आधारित असते. त्यामुळे प्रत्येक नागरिकाची अचूक नोंद अत्यंत महत्त्वाची ठरते.
केंद्र शासनाने नागरिकांसाठी स्वयं जनगणना (Self-Enumeration) ही सुविधा उपलब्ध करून दिली असून, ही प्रक्रिया सोपी, जलद आणि सुलभ आहे. निफाड शहराच्या सर्वांगीण विकासासाठी नागरिकांनी मोठ्या प्रमाणावर सहभाग नोंदवावा, असे आवाहन प्रशासनाकडून करण्यात आले आहे.
