मुंबई (प्रतिनिधी, दि. ०६ मे) :
महाराष्ट्र राज्य मार्ग परिवहन महामंडळाच्या (एसटी) वतीने सवलतधारक प्रवाशांसाठी सुरू करण्यात आलेल्या NCMC (National Common Mobility Card) स्मार्ट कार्ड योजनेत काही अधिकृत विक्रेत्यांकडून जादा दर आकारल्याच्या तक्रारी समोर आल्या आहेत.
या पार्श्वभूमीवर परिवहन मंत्री तथा एसटी महामंडळाचे अध्यक्ष प्रताप सरनाईक यांनी स्पष्ट इशारा दिला आहे की, ठरवून दिलेल्या दरापेक्षा अधिक रक्कम आकारणाऱ्या परवानाधारक विक्रेत्यांचे परवाने तात्काळ रद्द करण्यात येतील. काही विक्रेत्यांवर कारवाई करत परवाने रद्द करण्यात आल्याची माहितीही त्यांनी दिली.
सध्या नवीन NCMC कार्डसाठी १९९ रुपये, तर पूर्वीच्या स्मार्ट कार्डधारकांसाठी १४९ रुपये दर निश्चित करण्यात आला आहे. राज्यभरात ३००० हून अधिक अधिकृत विक्रेते तसेच बसस्थानकांवर ही कार्डे उपलब्ध करून देण्यात आली आहेत.
महामंडळाच्या माहितीनुसार, महिला, ज्येष्ठ नागरिक आणि अमृत ज्येष्ठ नागरिक यांच्यासाठी कार्ड नोंदणी व वितरण प्रक्रिया सुरू असून, पुढील टप्प्यात इतर सवलतधारक प्रवाशांनाही या योजनेत समाविष्ट करण्यात येणार आहे.
लवकरच एसटी प्रवासासाठी NCMC कार्डचा वापर अनिवार्य केला जाणार असून, डिजिटल पद्धतीमुळे सवलतींचा लाभ अधिक पारदर्शक आणि अचूकरीत्या मिळणार असल्याचे प्रशासनाने स्पष्ट केले आहे. तसेच कार्ड टॉप-अप, तिकीट वितरण आणि व्यवहारांसाठी एकसंध SOP लागू करण्यात आली आहे.
या निर्णयामुळे एसटी सेवा अधिक आधुनिक आणि प्रवासी-केंद्रित होणार असल्याचे परिवहन मंत्री सरनाईक यांनी सांगितले.
