उल्हासनगर (प्रतिनिधी, ठाणे) :
किडनी ट्रान्सफर करण्याचे आमिष दाखवून एका कुटुंबाची तब्बल ३१ लाख ६७ हजार ८६० रुपयांची फसवणूक झाल्याचा धक्कादायक प्रकार उघडकीस आला आहे. या प्रकरणी विठ्ठलवाडी पोलीस ठाण्यात डॉक्टरसह ७ जणांविरुद्ध गुन्हा दाखल करण्यात आला आहे.
पीडित दिपाली आनंद चव्हाण यांच्या पतीची किडनी खराब असल्याने प्रत्यारोपणाची गरज होती. याच संधीचा गैरफायदा घेत आरोपींनी किडनी डोनर उपलब्ध करून देणे तसेच ऑपरेशन करून देण्याचे आमिष दाखवले.
मोसमी जयदेव बिस्वास, जयदेव बिस्वास, सुमानता पांडे, इकबाल अहमद मोहमद सिद्दीकी जहागीर खान, अभिषेक मन्ना, मोहमद शोएब मोहमद अब्बास अन्सारी आणि डॉ. गौरव धर्मा नायर यांनी मिळून २ जुलै २०२५ ते ७ मार्च २०२६ या कालावधीत रोख व ऑनलाईन स्वरूपात मोठी रक्कम घेतली. मात्र आश्वासन देऊनही कोणतीही शस्त्रक्रिया किंवा किडनी प्रत्यारोपण करण्यात आले नाही.
नंतर आपली फसवणूक झाल्याचे लक्षात आल्यानंतर दिपाली चव्हाण यांनी पोलिसांकडे तक्रार दाखल केली. वरिष्ठ पोलीस निरीक्षक अशोक कोळी यांच्या मार्गदर्शनाखाली गुन्हा नोंदवण्यात आला असून अद्याप कोणालाही अटक झालेली नाही.
दरम्यान, या प्रकरणात किडनी रॅकेटचा संशय व्यक्त करण्यात येत असून, इतरही नागरिकांची अशाच प्रकारे फसवणूक झाली आहे का याचा तपास पोलीस उपायुक्त सचिन गोरे यांच्या मार्गदर्शनाखाली सुरू आहे.
