खटाव प्रतिनिधी
पुसेसावळी जिल्हा परिषद शिक्षण व अर्थ समिती सभापती सौ. तेजस्विनी कदम यांनी जिल्हा परिषदेच्या प्राथमिक शिक्षण विभागामार्फत खाजगी प्राथमिक व जिल्हा परिषद शाळांतील शिक्षकांच्या समायोजनाची प्रक्रिया पारदर्शकपणे पूर्ण करण्यात आल्याची माहिती दिली.
विद्यार्थ्यांच्या पटसंख्येनुसार आणि संच मान्यतेच्या नियमानुसार दरवर्षी शिक्षक समायोजन प्रक्रिया राबविण्यात येते. मात्र, गेल्या दोन वर्षांपासून न्यायालयीन प्रक्रियेमुळे ही कार्यवाही रखडली होती. यावर्षी शिक्षण विभागाने ३० एप्रिलपूर्वी समायोजन पूर्ण करण्याचे निर्देश जिल्हा परिषदेला दिले होते.
त्या अनुषंगाने तालुका स्तरावर गटविकास अधिकाऱ्यांच्या माध्यमातून खाजगी प्राथमिक शाळांतील समायोजन प्रक्रिया पूर्ण करण्यात आली. तसेच जिल्हास्तरावर खाजगी प्राथमिक शाळांतील १९ शिक्षकांचे आणि जिल्हा परिषद शाळांतील १७ शिक्षकांचे समायोजन करण्यात आले. यामध्ये १९ भाषा व समाजशास्त्र पदवीधर शिक्षकांचाही समावेश होता.
ही संपूर्ण प्रक्रिया जिल्हा परिषद अध्यक्षा डॉ. प्रिया शिंदे आणि उपाध्यक्ष राजू भोसले यांच्या मार्गदर्शनाखाली पारदर्शकपणे पार पडल्याचे तेजस्विनी कदम यांनी सांगितले. शिक्षण विभागाच्या या कार्यवाहीमुळे शिक्षकांमध्ये समाधानाचे वातावरण निर्माण झाले आहे.
