सारथी महाराष्ट्राचा | पाटणबोरी प्रतिनिधी
पाटणबोरी गावात आज, दि. ६ मे रोजी सायंकाळी साडेसहा वाजण्याच्या सुमारास तेलंगणा राज्य परिवहन महामंडळाच्या बसखाली येऊन एका युवकाचा दुर्दैवी मृत्यू झाला. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, तेलंगणा राज्य परिवहनची बस क्रमांक TS 01 Z 0152 ही नागपूरहून आदिलाबादकडे जात होती. पाटणबोरी बसस्थानकाजवळ राष्ट्रीय महामार्ग क्रमांक ४४ वर बस पोहोचत असताना अचानक एक युवक बसच्या मागील चाकाखाली आला. यात त्याचा जागीच मृत्यू झाला.
मृत युवकाचे नाव नरेश रामचरण प्रेमप्रस्थ (वय २४, रा. अतेरवा, ता. सुरी, जि. मुंगेली, छत्तीसगड) असे आहे. नरेश हा आपल्या मित्रासोबत हैदराबाद येथे क्रेशरवर कामासाठी जात असल्याची माहिती समोर आली आहे.
त्याचा मित्र रामलखन भवरसिंग मरावे (वय २५) याला अचानक फिट आल्याने नरेश घाबरला आणि मदतीसाठी धावपळ करू लागला. याच गोंधळात तो रस्त्यावरून जाणाऱ्या बसच्या चाकाखाली आल्याचे सांगितले जात आहे.
घटनेनंतर स्थानिक नागरिकांनी तत्काळ नरेश याला पाटणबोरी प्राथमिक आरोग्य केंद्रात दाखल केले. मात्र डॉक्टरांनी तपासणीनंतर त्याला मृत घोषित केले.
या घटनेमुळे पाटणबोरी परिसरात शोककळा पसरली असून पोलिसांकडून पुढील तपास सुरू आहे.
