उदगीर | प्रतिनिधी
उदगीर लाईन्स धर्मदाय नेत्र रुग्णालय व नेत्र सेवा प्रतिष्ठान यांच्या संयुक्त विद्यमाने आयोजित करण्यात आलेल्या २०० व्या नेत्रशिबिरात ५४ यशस्वी शस्त्रक्रिया करण्यात आल्या. तसेच शिबिरादरम्यान १५२ रुग्णांची नेत्र तपासणी करण्यात आली.
या शिबिराचे उद्घाटन नगराध्यक्षा स्वाती हुडे यांच्या हस्ते संपन्न झाले. यावेळी उपनगराध्यक्षा शितल शिंदे, उदयगिरी लाईन्स धर्मदाय नेत्र रुग्णालयाचे अध्यक्ष रामप्रसाद लखोटिया, नेत्र सेवा प्रतिष्ठानचे मयुरसुदन झंवर, डॉ. राजेश पवार, डॉ. सचिन गाडे, सचिव प्रा. महेश बासकर, सुरेश देबडवार, कोषाध्यक्ष अजय मलगे, विवेक जैन, बालाजी आड्यपा यांच्यासह अनेक मान्यवर उपस्थित होते.
शिबिरात तिरळेपणा, मंद दृष्टी याबाबत समाजातील गैरसमज दूर करण्यासाठी मार्गदर्शन करण्यात आले. आधुनिक शस्त्रक्रियेद्वारे उपलब्ध उपचारांची माहिती देत नेत्रतज्ज्ञांनी लहान मुलांमध्ये तिरळेपणा दिसल्यास दुर्लक्ष करू नये, असा सल्ला पालकांना दिला.
यावेळी नरसिंग कॉलेजचे विद्यार्थी, रुग्णालय कर्मचारी, रुग्णांचे नातेवाईक आणि नागरिक मोठ्या संख्येने उपस्थित होते.
