प्रतिनिधी
पाताळगंगा (खोपोली) : ७ मे
ग्रुप ग्रामपंचायत वडगाव गावातील ग्रामपंचायतीस पाणीपुरवठ्यासाठी देण्यात आलेल्या पाण्याच्या टाकीच्या जागेची परस्पर विक्री झाल्याचा धक्कादायक प्रकार समोर आला असून, यामुळे स्थानिकांमध्ये संतापाचे वातावरण निर्माण झाले आहे. संबंधित ठिकाणी सध्या घराचे बांधकाम सुरू असल्याची माहिती मिळत आहे.
मिळालेल्या माहितीनुसार, वडगाव येथील संबंधित जागेवर सुमारे १५ वर्षांपासून पाण्याची टाकी उभी होती. टाकीच्या देखभालीसाठी मूळ मालकाच्या मुलाला कामावर ठेवण्यात आले होते. मात्र कालांतराने ही टाकी जीर्ण झाल्याने ती पाडण्यात आली व काही दिवसांपूर्वी त्या जागेचे सपाटीकरण करण्यात आले. याचाच फायदा घेत मूळ मालकाने सदर जागेची परस्पर विक्री केल्याचे समोर येत आहे.
दरम्यान, या जागेवरून स्थानिकांची पायवाट जात असल्याने सुरू असलेल्या बांधकामामुळे ये-जा करण्याच्या मार्गावर बंदी येण्याची शक्यता निर्माण झाली आहे. त्यामुळे ग्रामस्थांच्या दैनंदिन जीवनावर परिणाम होण्याची भीती व्यक्त होत आहे.
या प्रकरणी ग्रामपंचायत प्रशासनाची भूमिका काय आहे तसेच जागेची विक्री कायदेशीर आहे का, याबाबत प्रश्नचिन्ह उपस्थित केले जात आहे. या प्रकरणाची चौकशी करून संबंधितांवर योग्य ती कारवाई करण्यात यावी, अशी लेखी तक्रार नथुराम गडगे यांनी प्रशासनाकडे केली आहे.
—————— चौकट ——————
“सदर जागा ग्रुप ग्रामपंचायत वडगाव यांना पिण्याच्या पाण्याच्या टाकीसाठी देण्यात आली होती. त्याच्या मोबदल्यात संबंधितांच्या मुलाला कामावर ठेवण्यात आले होते. मात्र टाकी जीर्ण झाल्यानंतर ती पाडण्यात आली आणि रिक्त झालेली जागा हरिभाऊ श्यामा पाटील यांनी परस्पर विक्री करून आमच्या पायवाटीचा प्रश्न निर्माण केला आहे. ग्रामपंचायतीची फसवणूक केल्याप्रकरणी संबंधितांवर कारवाई करण्यात यावी.”
— नथुराम गडगे, ग्रामस्थ वडगाव
—————— चौकट ——————
“सदर जागेच्या ठिकाणी घराचे बांधकाम सुरू असल्याचे निदर्शनास आले आहे. यासंदर्भात ग्रुप ग्रामपंचायत वडगाव यांच्या माध्यमातून हरिभाऊ पाटील गडगे यांना आठ दिवसांच्या आत बांधकाम हटवून जागा मोकळी करण्याबाबत पत्रव्यवहार करण्यात आला आहे.”
— सुहास वारे, ग्रामविकास अधिकारी, ग्रुप ग्रामपंचायत वडगाव
