खेड़ पिंपरी प्रतिनिधी :
खेड़ पिंपरी गावाकरिता सरपंच मंगेश हंसराज कांबळे यांच्या श्रमांना अखेर यश मिळण्याच्या मार्गावर असून खेड पिंपरी ते पापड या ५ किमी रस्त्याच्या कामाला मंजुरी मिळण्याच्या अंतिम टप्प्यात आहे.
सदर रस्ता अत्यंत दुर्गम व खराब अवस्थेत असल्याने पापड, पिंपडगाव, शिवरा, सालोड, देऊळगाव, खेड पिंपरी या गावांतील नागरिकांना अमरावती येथे दवाखाना, कॉलेज व शाळेसाठी जाण्यास मोठ्या अडचणींचा सामना करावा लागत होता. विशेषतः विद्यार्थ्यांना शिक्षणासाठी गंभीर अडचणी निर्माण झाल्या होत्या. सायकल चालविणेही कठीण झाल्याने ग्रामस्थांमध्ये नाराजी होती.
हा रस्ता भारताचे पहिले कृषी मंत्री डॉ. भाऊसाहेब पंजाबराव देशमुख यांच्या पापड गावाशी जोडणारा महत्त्वाचा मार्ग आहे. त्यामुळे या रस्त्याच्या विकासासाठी ग्रामसभेत अनेक वेळा चर्चा करण्यात आली होती.
या पार्श्वभूमीवर सरपंच मंगेश कांबळे यांनी मा. आमदार प्रतापदादा अडसड यांना प्रत्यक्ष भेटून मुख्यमंत्री ग्राम सडक योजनेतून रस्ता मंजूर करण्याची मागणी केली. तसेच तहसीलदार, जिल्हाधिकारी कार्यालय अमरावती, मुख्य कार्यकारी अधिकारी तसेच महसूल मंत्री व पालकमंत्री Chandrashekhar Bawankule यांना प्रत्यक्ष भेटून निवेदने देण्यात आली होती.
सरपंचांच्या सातत्यपूर्ण पाठपुराव्यामुळे व आमदार प्रताप अडसड यांच्या विशेष सहकार्याने हा रस्ता मंजुरीच्या अंतिम टप्प्यात पोहोचला आहे. ५.१८ मीटर रुंदीचा सिमेंट काँक्रीट रस्ता व आवश्यक पुलाचे काम करण्यात येणार असल्याची माहिती मुख्यमंत्री ग्राम सडक योजनेचे अधिकारी विरुळकर व इंगोले यांनी दिली आहे.
प्रत्यक्ष पाहणी व मोजमापही पूर्ण करण्यात आले असून लवकरच काम सुरू होणार असल्याचे आश्वासन देण्यात आले आहे.
या यशामुळे ग्रामस्थांमध्ये समाधानाचे वातावरण निर्माण झाले असून सरपंचांच्या प्रयत्नांना मोठे यश मिळाल्याची भावना व्यक्त केली जात आहे.
यावेळी ग्रामपंचायत सदस्य अनिकेत चौधरी, संतोष चौधरी, रुपेश राऊत, विलास सावदे, योगेश डांगे, पवन जाधव, प्रमोद राऊत, संतोष शेळके तसेच मुख्यमंत्री ग्राम सडक योजनेचे अधिकारी विरुळकर साहेब आदी उपस्थित होते.
