गडचिरोली/चामोर्शी : न.प. बांधकाम सभापती वैभव भिवापूरे परिवाराकडून वाढत्या उन्हाच्या तीव्रतेच्या पार्श्वभूमीवर नागरिकांसाठी शहरातील बाजारपेठ परिसरात मोफत पिण्याच्या पाण्याची पाणपोई सुरू करण्यात आली आहे. या उपक्रमाचे सर्वत्र कौतुक होत आहे.
नगरपंचायतीचे बांधकाम सभापती वैभव भिवापूरे आणि नगरसेविका वर्षा भिवापूरे यांच्या संकल्पनेतून हा सामाजिक उपक्रम साकारण्यात आला आहे. बाजारपेठेतील त्यांच्या कार्यालयासमोर सुरू करण्यात आलेल्या या पाणपोईवर दिवसभर स्वच्छ व थंड पिण्याच्या पाण्याची व्यवस्था करण्यात आली आहे.
ही पाणपोई बाजारपेठेत येणारे प्रवासी, कामगार, रिक्षाचालक, मजूर तसेच ज्येष्ठ नागरिकांसाठी अत्यंत उपयुक्त ठरत असून नागरिक मोठ्या प्रमाणात या सुविधेचा लाभ घेत आहेत.
सध्या तापमानात सातत्याने वाढ होत असल्याने उन्हाच्या झळा सहन कराव्या लागत आहेत. अशा परिस्थितीत गर्दीच्या ठिकाणी पिण्याच्या पाण्याची सुविधा उपलब्ध करून देणे ही काळाची गरज असल्याचे मत नागरिकांनी व्यक्त केले.
‘जनसेवा हीच ईश्वर सेवा’ या भावनेतून हा उपक्रम राबविण्यात आल्याची माहिती भिवापूरे परिवाराने दिली आहे. या पाणपोईमुळे नागरिकांना मोठा दिलासा मिळत असून उपक्रमाचे सर्वत्र स्वागत होत आहे.
