दापोली | प्रतिनिधी
“याची देही, याची डोळा… देखिला विठ्ठल सोहळा!” या भक्तिभावपूर्ण वातावरणात दापोली तालुक्यातील बोरथळ गाव सध्या संपूर्णपणे विठ्ठलमय झाले आहे. श्री विठ्ठल रखुमाई आदर्श मंडळाच्या वतीने मंदिर स्थापनेच्या २५ व्या वर्षानिमित्त मंगळवार दि. १२ मे आणि बुधवार दि. १३ मे २०२६ रोजी भव्य रौप्य महोत्सव सोहळ्याचे आयोजन करण्यात आले आहे.
गेल्या २५ वर्षांपासून बोरथळ येथील विठ्ठल मंदिर हे गावाच्या आध्यात्मिक, सांस्कृतिक आणि सामाजिक जीवनाचे केंद्र राहिले असून हजारो भाविकांच्या श्रद्धेचा आधार ठरले आहे. या रौप्यमहोत्सवी पर्वानिमित्त दोन दिवस विविध धार्मिक, सांस्कृतिक आणि समाजप्रबोधनपर कार्यक्रमांची पर्वणी भाविकांना अनुभवता येणार आहे.
✨ भक्ती, संस्कृती आणि परंपरेचा संगम
मंदिर परिसर आकर्षक सजावटीने नटला असून गावात सर्वत्र भक्तीचा उत्साह ओसंडून वाहत आहे. विठ्ठल नामाचा गजर, कीर्तन आणि भजनांनी संपूर्ण परिसर भक्तिमय होणार आहे.
📅 मंगळवार | १२ मे २०२६
सकाळी ७ वाजता मूर्ती पूजन, त्यानंतर महाआरती व श्री सत्यनारायण महापूजा होणार आहे. दुपारी महिलांसाठी हळदी-कुंकू समारंभ व महाप्रसादाचे आयोजन करण्यात आले आहे. सायंकाळी ह.भ.प. संभाजी महाराज सावंत, ह.भ.प. राजेंद्र महाराज जाधव आणि ह.भ.प. चंद्रशेखर महाराज सावंत यांच्या प्रवचन, कीर्तन व हरिपाठातून भक्तांना आध्यात्मिक मेजवानी मिळणार आहे.
📅 बुधवार | १३ मे २०२६
पहाटे मूर्ती अभिषेक, सकाळी ९ वाजता भव्य दिंडी व पालखी मिरवणूक काढण्यात येणार आहे. दुपारी मुलांसाठी स्पर्धा, महिलांसाठी ‘सखी आनंदोत्सव’ व पुरुषांसाठी क्रिकेट स्पर्धांचे आयोजन करण्यात आले आहे. रात्री रेकॉर्ड डान्स व ज्येष्ठ नागरिकांचा सत्कार समारंभ होणार असून सामाजिक ऐक्याचा संदेश दिला जाणार आहे.
“भक्तीच्या वाटेवर चालताना २५ वर्षांचा प्रवास पूर्ण; आता विठ्ठल नामाच्या गजरात बोरथळ सज्ज!”
