माहूर | राजकीय वार्ता
माहे डिसेंबर २०२६ मध्ये होऊ घातलेल्या माहूर नगर पंचायत सार्वत्रिक निवडणुकांचे पडघम आतापासूनच वाजू लागले असून विविध राजकीय पक्षांनी मोर्चेबांधणीला सुरुवात केली आहे. विशेष म्हणजे या निवडणुकीत जनतेतून नगराध्यक्ष निवडला जाणार असल्याने स्पर्धा अधिक तीव्र होण्याची शक्यता आहे.
सन २०२१ च्या निवडणुकीत राष्ट्रवादी काँग्रेस ७, काँग्रेस ६, शिवसेना ३ व भाजप १ असे नगरसेवक निवडून आले होते. त्यानंतर महाविकास आघाडीतील राष्ट्रवादी व शिवसेना यांनी एकत्र सत्ता स्थापन केली होती.
सद्यस्थितीत राष्ट्रवादी काँग्रेस आणि शिवसेना या दोन्ही पक्षांमध्ये अंतर्गत विभागणी झाल्याने त्यांच्या राजकीय गणितांवर परिणाम झाल्याचे बोलले जात आहे. मात्र माहूर नगर पंचायतीत दोन्ही पक्षांची आघाडी अजूनही टिकून असल्याचे दिसून येत आहे.
शिवसेना उबाठा गटाकडून उपनगराध्यक्ष ज्ञानेश्वर उर्फ नाना लाड हे नगराध्यक्ष पदासाठी इच्छुक असल्याची चर्चा आहे.
भाजपकडून आमदार Bhimrao Keram यांच्या मार्गदर्शनाखाली शहराध्यक्ष व विद्यमान एकमेव नगरसेवक गोपू महामुने यांनी मोर्चेबांधणी सुरू केली आहे. तसेच भाजपकडून माहूर नगर पंचायतीवर सत्ता मिळवण्यासाठी जोरदार प्रयत्न सुरू आहेत.
राष्ट्रवादी काँग्रेस श.प.चे नगराध्यक्ष फिरोज दोसानी यांनी आपल्या कार्यकाळातील विकासकामांच्या जोरावर पुन्हा सत्ता राखण्याचा निर्धार व्यक्त केला आहे. तर काँग्रेसकडून जिल्हाध्यक्ष राजेश पावडे यांच्या नेतृत्वाखाली तयारी सुरू आहे. तालुकाध्यक्ष आनंद पाटील तुपदाळे हे घरकुल व स्थानिक प्रश्नांवर लक्ष केंद्रित करून जनतेची सहानुभूती मिळवण्याच्या प्रयत्नात आहेत.
मुस्लिम मतदारांची लक्षणीय संख्या तसेच पारंपरिक काँग्रेस समर्थक मतदार हा काँग्रेससाठी महत्त्वाचा घटक ठरणार आहे.
एमआयएमकडून युवा नेते इर्शाद मकरानी यांना नगराध्यक्ष पदाचा उमेदवार म्हणून पुढे आणण्याची शक्यता असून तालुकाध्यक्ष सज्जाद शेख यांनी तयारीला वेग दिला आहे.
दरम्यान, माजी नगराध्यक्ष प्राचार्य राजेंद्र केशवे यांच्या नावाचीही राजकीय वर्तुळात चर्चा सुरू आहे. भाजपकडून त्यांना ऐनवेळी उमेदवारी मिळण्याची शक्यता व्यक्त केली जात आहे.
काँग्रेस, एमआयएम आणि वंचित बहुजन आघाडीने एकत्र निवडणूक लढवावी अशीही चर्चा समर्थकांमध्ये सुरू आहे.
आगामी सहा महिन्यांत राजकीय घडामोडींना आणखी वेग येण्याची चिन्हे दिसत असून माहूर नगर पंचायतीची निवडणूक अत्यंत चुरशीची होणार असल्याचे स्पष्ट होत आहे.
