पाथरी | प्रतिनिधी :
दिनांक 05/05/2026 रोजी नसरापूर येथे 4 वर्षीय चिमुकलीवर झालेल्या अमानुष अत्याचाराच्या घटनेचा निषेध व्यक्त करण्यासाठी पाथरी येथे भव्य निषेध मोर्चा काढण्यात आला. त्यानंतर उपविभागीय अधिकारी (SDM) मा. संगीता चव्हाण मॅडम यांना निवेदन देण्यात आले.
या घटनेने संपूर्ण परिसरात संतापाची लाट उसळली असून, “गुन्हेगाराला जात नसते तसेच अन्यायग्रस्तालाही जात नसते” असा संदेश देत नागरिकांनी एकजुटीने निषेध नोंदवला.
मोर्चात सर्व समाजातील नागरिक, महिला मंडळ, तरुण, तसेच सामाजिक कार्यकर्ते मोठ्या संख्येने सहभागी झाले होते. उपस्थितांनी अशा अमानवी घटनांवर कठोरात कठोर कारवाई करून आरोपीला लवकरात लवकर कठोर शिक्षा द्यावी, अशी मागणी केली.
निषेध मोर्चाची सुरुवात जागृत हनुमान मंदिर, शिक्षक कॉलनी पाथरी येथून करण्यात आली. या वेळी ॲड. कोंत वकिल साहेब यांनी प्रास्ताविक केले, तर नगर परिषद पाथरीचे नगरसेवक तथा उपाध्यक्ष आलोक चौधरी यांनी पुढाकार घेऊन मोर्चाचे आयोजन केले.
या आंदोलनात दैनिक कलमवीरच्या तालुका प्रतिनिधी रेखा मनेरे तसेच अनेक सामाजिक कार्यकर्त्यांनी सक्रिय सहभाग नोंदवला.
नागरिकांनी प्रशासनाला आवाहन केले की, भविष्यात अशा घटना टाळण्यासाठी कठोर उपाययोजना करून प्रत्येक स्त्री, मुलगी आणि कुटुंब सुरक्षित राहील याची हमी द्यावी.
