चिपळूण : प्रतिनिधी
परशुराम एज्युकेशन सोसायटी, चिपळूण संचलित मोरेश्वर आत्माराम आगवेकर माध्यमिक विद्यालय व सी.ए. वसंतराव लाड कला-वाणिज्य कनिष्ठ महाविद्यालय, अलोरे ता. चिपळूण जि. रत्नागिरी येथील माध्यमिक शालांत परीक्षा मार्च २०२६ चा निकाल उत्कृष्ट लागला असून प्रशालेने ९७.१६ टक्के निकालाची चमकदार कामगिरी नोंदवली आहे.
यावर्षी परीक्षेस एकूण १०६ विद्यार्थी बसले होते. त्यापैकी १०३ विद्यार्थी उत्तीर्ण झाले असून शाळेचा निकाल ९७.१६ टक्के लागला आहे. राज्याचा एकूण निकाल ९२.०९ टक्के तर कोकण बोर्डाचा निकाल ९७.६२ टक्के लागला आहे.
गुणानुक्रमात कुमार अथर्व सचिन पाकटे याने ४८६+०५ गुण मिळवत ९८.२० टक्क्यांसह प्रथम क्रमांक पटकावला. कुमारी सोनाली अनिल मोहिते हिने ४७९+०५ गुणांसह ९६.८० टक्के मिळवत द्वितीय, तर कुमार तनिष्क मनोज कोतवडेकर याने ४७०+०५ गुणांसह ९५.०० टक्के मिळवत तृतीय क्रमांक प्राप्त केला.
नागावे सुकाईनगर येथील श्री. सचिन पाकटे यांचे चिरंजीव अथर्व सचिन पाकटे याने इयत्ता दहावीच्या परीक्षेत ९८.२० टक्के गुण मिळवत अलोरे हायस्कूलमध्ये प्रथम क्रमांक पटकावल्याबद्दल त्याचे सर्व स्तरातून कौतुक होत आहे. त्याच्या या यशाबद्दल हार्दिक अभिनंदन करण्यात येत असून पुढील शैक्षणिक वाटचालीसाठी शुभेच्छांचा वर्षाव होत आहे.
