पातूर प्रतिनिधी :
सावरगाव येथे १० वर्षीय चिमुकलीवर झालेल्या अमानुष अत्याचाराच्या घटनेने संपूर्ण जिल्हा हादरला असून सर्वत्र संतापाची लाट उसळली आहे. मानवतेला काळिमा फासणाऱ्या या घटनेतील आरोपीस कठोरात कठोर शिक्षा देऊन फाशीची शिक्षा सुनावण्यात यावी, अशी तीव्र मागणी शिवसेना शिंदे गटाच्या वतीने करण्यात आली आहे.
या प्रकरणाची गंभीर दखल घेत महाराष्ट्राचे उपमुख्यमंत्री Eknath Shinde यांनी पीडित मुलीच्या कुटुंबीयांशी व्हिडिओ कॉलद्वारे संवाद साधला. त्यांनी कुटुंबीयांना धीर देत शासन त्यांच्या पाठीशी ठामपणे उभे असल्याचा विश्वास दिला. तसेच शिवसेना पक्षाच्या वतीने पीडित कुटुंबाला एक लाख रुपयांची आर्थिक मदत जाहीर करण्यात आली.
उपमुख्यमंत्री शिंदे यांनी संबंधित अधिकाऱ्यांना आरोपीवर कठोर कारवाई करण्याच्या सूचना दिल्या असून, पीडित कुटुंबाला न्याय मिळवून देण्यासाठी शासन सर्वतोपरी प्रयत्न करेल, असे आश्वासन दिले. या प्रकरणाचा जलदगती न्यायालयात खटला चालवून दोषीला कठोर शिक्षा देण्याची मागणीही करण्यात आली आहे.
घटनेनंतर सावरगावसह परिसरातील शिवसैनिकांनी तीव्र भावना व्यक्त करत, अशा प्रकारच्या घटना पुन्हा घडू नयेत यासाठी समाजाने एकत्र येण्याची गरज असल्याचे सांगितले. महिलांच्या आणि अल्पवयीन मुलींच्या सुरक्षेचा प्रश्न पुन्हा ऐरणीवर आला असून नागरिकांमध्ये भीतीचे वातावरण निर्माण झाले आहे.
शिवसेना अकोला जिल्हा संपर्क प्रमुख Rajan Salvi यांनी व्हिडिओ कॉलद्वारे पीडित कुटुंबाशी संवाद साधत, “शिवसेना संपूर्ण ताकदीने तुमच्या पाठीशी उभी राहील,” असा शब्द दिला.
यावेळी शिवसेना जिल्हाध्यक्ष Narayan Gawhankar यांनी, “आज एका निष्पाप मुलीवर अत्याचार झाला आहे; उद्या अशी घटना दुसऱ्या कोणाच्या घरात घडू नये यासाठी समाजाने जागृत होणे आवश्यक आहे,” अशी भावना व्यक्त केली.
दरम्यान, सामाजिक कार्यकर्ते Nilesh Totaram Kapkar यांच्या वतीने पीडित कुटुंबाला ११ हजार रुपयांची आर्थिक मदत देण्यात आली.
यावेळी जिल्हाप्रमुख पांडे गुरुजी, महिला जिल्हाप्रमुख उषाताई विर्क, डॉ. अशोक ओळंबे, प्रणव तायडे पाटील, बाळू बगाडे, सागर लाड, प्रमोद चोंढकर, शंकर जाधव, राधेश्याम राठी, अजय राठी, कैलास कचाले, प्रल्हाद मदने, संपत राठोड, बाळू पांडे यांच्यासह अनेक शिवसैनिक उपस्थित होते.
