प्रतिनिधी :
वर्धा, दि. ०९ मे २०२६ :
वर्धा पोलिस दलातील महिला अधिकारी व अंमलदारांसाठी महिलांच्या आरोग्यविषयक समस्यांवर मार्गदर्शन करण्यासाठी विशेष कार्यशाळेचे आयोजन करण्यात आले. ही कार्यशाळा पोलिस मुख्यालय (PHQ) वर्धा येथील सभागृहात सकाळी १० ते ११.३० वाजेदरम्यान पार पडली.
महिलांचे आरोग्य हा समाजाचा अत्यंत महत्त्वाचा विषय असून, पोलिस दलात कार्यरत महिलांना कामाच्या तणावामुळे स्वतःच्या आरोग्याकडे दुर्लक्ष करावे लागते. याच पार्श्वभूमीवर या कार्यशाळेचे आयोजन करण्यात आले होते.
कार्यशाळेत शहरातील प्रसिद्ध स्त्रीरोग तज्ज्ञ डॉ. रेखा रायजादा, डॉ. नीलिमा जोशी आणि डॉ. प्रविणा जैन यांनी मार्गदर्शन केले. यावेळी बदलती जीवनशैली, मानसिक तणाव, संतुलित आहार, नियमित व्यायाम, वैद्यकीय तपासणी तसेच वयोमानानुसार होणारे शारीरिक बदल याविषयी सविस्तर माहिती देण्यात आली.
या कार्यशाळेस वर्धा पोलिस दलातील ०५ महिला पोलिस अधिकारी आणि ९५ महिला पोलिस अंमलदार अशा एकूण १०० महिला कर्मचारी उपस्थित होत्या. उपस्थित महिलांनी तज्ज्ञ डॉक्टरांशी संवाद साधत विविध आरोग्यविषयक शंकांचे निरसन करून घेतले.
महिला कर्मचाऱ्यांनी स्वतःच्या आरोग्याबाबत जागरूक राहावे, या उद्देशाने आयोजित या उपक्रमाचे सर्व स्तरातून कौतुक करण्यात आले. सदर कार्यक्रमाचे आयोजन पोलिस अधीक्षक कार्यालय, वर्धा यांच्या मार्गदर्शनाखाली करण्यात आले.
— आशिष चिलंगे
सहाय्यक जनसंपर्क अधिकारी,
पोलीस अधीक्षक कार्यालय, वर्धा
