वर्धा, दि. ८ मे :
“स्वच्छता हीच सेवा” हा संदेश देत वर्धा जिल्हा पोलिस दलाच्या वतीने विशेष श्रमदान मोहीम राबविण्यात आली. पोलिस अधीक्षक श्री. सौरभ कुमार अग्रवाल यांच्या संकल्पनेतून तसेच अपर पोलिस अधीक्षक श्री. सदाशिव वाघमारे यांच्या मार्गदर्शनाखाली आयोजित या मोहिमेत वरिष्ठ अधिकारी ते पोलिस अंमलदारांपर्यंत सर्वांनी उत्स्फूर्त सहभाग नोंदविला.
या मोहिमेदरम्यान पोलिस मुख्यालय परिसर, शासकीय निवासस्थान परिसर, एमटी सेक्शन, ग्रामीण भागातील पोलिस ठाणे तसेच पोलिस अधीक्षक कार्यालयाच्या मुख्य इमारतीसह विविध ठिकाणी स्वच्छता करण्यात आली. जिल्ह्यातील प्रत्येक पोलिस ठाण्याच्या प्रभारी अधिकाऱ्यांनी आपल्या कर्मचाऱ्यांसह परिसर स्वच्छतेत सक्रिय सहभाग घेतला.
प्रशासकीय शिस्त आणि कर्तव्यभावनेसह सामाजिक उत्तरदायित्व जपत पोलिस अधिकारी व कर्मचाऱ्यांनी स्वतः हातात झाडू घेऊन परिसर स्वच्छ केला. त्यामुळे अधिकारी व कर्मचाऱ्यांमध्ये उत्साहाचे वातावरण निर्माण झाले असून पोलिस दलातील संघभावना अधिक दृढ झाल्याचे दिसून आले.
पोलिस दल २४ तास जनसेवेसाठी कार्यरत असते. कामाचे ठिकाण स्वच्छ व प्रसन्न असल्यास मानसिक समाधान आणि कार्यक्षमतेत वाढ होते. तसेच नागरिकांमध्ये स्वच्छतेबाबत जनजागृती निर्माण करण्यासाठीही हा उपक्रम महत्त्वपूर्ण ठरत असल्याचे प्रशासनाने सांगितले.
या श्रमदान मोहिमेमध्ये पोलिस अधीक्षक श्री. सौरभ कुमार अग्रवाल, अपर पोलिस अधीक्षक श्री. सदाशिव वाघमारे, पोलिस निरीक्षक स्थानिक गुन्हे शाखा श्री. विनोद चौधरी, एमटी विभागाचे अधिकारी तसेच सर्व उपविभागीय पोलिस अधिकारी, ठाणेदार आणि पोलिस अंमलदार यांनी सहभाग नोंदविला.
