प्रतिनिधी :
हिंगणी : एका छोट्याशा गावातून जिद्द, मेहनत आणि चिकाटीच्या जोरावर मोठे यश संपादन करत कु. महक जितेंद्र कामडी हिने दहावीच्या बोर्ड परीक्षेत हिंगणी सर्कलमध्ये प्रथम क्रमांक पटकावला आहे. तिने ७४ टक्के गुण मिळवत आपल्या गावाचे तसेच कुटुंबाचे नाव उज्ज्वल केले आहे.
महकच्या या यशामुळे तिचे वडील श्री. जितेंद्र कामडी, आई सौ. सुनीता कामडी आणि संपूर्ण कामडी परिवाराचा अभिमान द्विगुणित झाला आहे. ग्रामीण भागातील विद्यार्थ्यांसाठी तिची ही कामगिरी प्रेरणादायी ठरत असून जिद्द आणि सातत्यपूर्ण प्रयत्नांच्या बळावर यश मिळवता येते, हे तिने सिद्ध करून दाखवले आहे.
यशाचे श्रेय शिक्षकांना
आपल्या यशाबद्दल बोलताना महक म्हणाली,
“हे यश मिळवण्यासाठी मला शाळेचे मुख्याध्यापक आणि सर्व शिक्षकांचे मोलाचे मार्गदर्शन लाभले. त्यांच्या खंबीर पाठिंब्यामुळेच मी हे यश संपादन करू शकले.”
पुढील वाटचालीस सज्ज
महकच्या यशानंतर शाळेच्या शिक्षक व कर्मचारी वृंदाने तिच्या घरी जाऊन सत्कार केला तसेच कुटुंबाचे अभिनंदन केले. यावेळी तिला पुढील शैक्षणिक वाटचालीसाठी शुभेच्छा देण्यात आल्या.
उच्च शिक्षणाचे स्वप्न उराशी बाळगून महक आता शिक्षणाचे माहेरघर मानल्या जाणाऱ्या पुणे शहरात पुढील शिक्षणासाठी झेप घेण्यास सज्ज झाली आहे.
