दौंड प्रतिनिधी –
अष्टविनायक विकास आराखड्याअंतर्गत तसेच पुरातत्त्व विभागाच्या मार्गदर्शनाखाली सुरू असलेल्या जतन, संवर्धन आणि दुरुस्ती कामांमुळे अष्टविनायकातील मोरगाव येथील श्री मयुरेश्वर मंदिर, थेऊर येथील श्री चिंतामणी मंदिर आणि सिद्धटेक येथील श्री सिद्धिविनायक मंदिर ही मंदिरे दि. १० मे २०२६ ते ९ जून २०२६ या कालावधीत भाविकांच्या दर्शनासाठी पूर्णपणे बंद ठेवण्यात येणार आहेत.
महाराष्ट्र शासनाने अष्टविनायक मंदिरांच्या जतन व संवर्धनासाठी विशेष निधी उपलब्ध करून दिला असून, या कामांसाठी चिंचवड देवस्थान ट्रस्टने शासनाचे आभार मानले आहेत. सध्या संबंधित मंदिरांच्या मुख्य गाभाऱ्याचे व सभामंडपाचे पौराणिक स्वरूप कायम ठेवत सुबक दगडी बांधकामाद्वारे संवर्धनाची कामे सुरू आहेत.
पुरातत्त्व विभागाच्या नियोजनानुसार ही कामे सुरळीत व वेळेत पूर्ण व्हावीत यासाठी मंदिर परिसर भाविकांसाठी तात्पुरता बंद ठेवण्याचा निर्णय घेण्यात आला आहे. मोठ्या प्रमाणातील गर्दीमुळे कामात अडथळे निर्माण होण्याची शक्यता असल्याने हा निर्णय आवश्यक असल्याचे प्रशासनाने स्पष्ट केले आहे.
यासंदर्भात पुरातत्त्व विभागाच्या संचालकांनी सह धर्मादाय आयुक्त, पुणे विभाग यांच्याकडे विनंती अर्ज सादर केला होता. त्यानंतर पुरातत्त्व विभाग, मंदिर प्रशासन, पुजारी वर्ग आणि ग्रामस्थ यांचे म्हणणे ऐकून घेत सह धर्मादाय आयुक्तांनी दि. ७ मे २०२६ रोजी मंदिर बंद ठेवण्याचे आदेश जारी केले.
त्यानुसार चिंचवड देवस्थान ट्रस्टच्या विश्वस्त मंडळानेही तीनही मंदिरे तात्पुरती बंद ठेवण्याचा ठराव मंजूर केला आहे. तसेच संबंधित गावांमध्ये ग्रामसभांद्वारे नागरिकांना माहिती देण्यात येत आहे.
दरम्यान, मंदिरांमध्ये नित्य पूजाअर्चा व धार्मिक विधी नियमित सुरू राहणार असून, भाविकांना मात्र प्रत्यक्ष दर्शन घेता येणार नाही. पुजारी, बांधकाम यंत्रणा, अधिकृत अधिकारी, कर्मचारी आणि विश्वस्त यांनाच मंदिर परिसरात प्रवेश दिला जाणार आहे.
मंदिरांची दीर्घकालीन सुरक्षितता, सुविधा आणि भाविकांच्या सोयीसाठी ही विकासकामे महत्त्वाची असल्याने नागरिकांनी प्रशासनाला सहकार्य करावे, असे आवाहन करण्यात आले आहे.
