खोपोली प्रतिनिधी :
खोपोली शहरातील नागरी सामाजिक विकास संस्था रजि. रायगड यांच्या वतीने आयोजित करण्यात आलेल्या बालसंस्कार वर्गाला विद्यार्थ्यांचा उत्स्फूर्त प्रतिसाद मिळत असून, संस्थेच्या मा. संस्थापक अध्यक्षा सौ. वर्षा राजेश मोरे यांच्या विशेष प्रयत्नातून हा उपक्रम उत्साहात सुरू आहे.
जेष्ठ नागरिक सभागृह, शास्त्रीनगर, खोपोली येथे दि. ४ मे २०२६ ते १६ मे २०२६ या कालावधीत सुरू असलेल्या बालसंस्कार वर्गामध्ये बहुसंख्य लहान विद्यार्थी सहभागी झाले आहेत. या विद्यार्थ्यांच्या प्रोत्साहनार्थ दि. ८ मे २०२६ रोजी भव्य सन्मान व प्रमाणपत्र वितरण कार्यक्रम आयोजित करण्यात आला.
यावेळी कु. तन्वीष प्रदीप सताणे यांच्यासह अनेक विद्यार्थ्यांचा प्रमाणपत्र देऊन गौरव करण्यात आला. कार्यक्रमास मा. संस्थापक अध्यक्षा सौ. वर्षा राजेश मोरे प्रमुख उपस्थित होत्या. तसेच संस्थेचे सर्व पदाधिकारी यांनी विद्यार्थ्यांचे कौतुक करत त्यांना प्रोत्साहन दिले.
बालसंस्कार वर्गामध्ये विद्यार्थ्यांकडून विविध उपक्रमांचा सराव करून घेत त्यांच्यावर चांगले संस्कार घडविण्याचे कार्य संस्थेमार्फत करण्यात येत आहे. विद्यार्थ्यांना संस्कार, शिस्त आणि सामाजिक जाणीव निर्माण व्हावी यासाठी घेतली जाणारी मेहनत पालकांच्या विशेष कौतुकास पात्र ठरत आहे.
या उपक्रमामुळे सौ. वर्षा राजेश मोरे तसेच संस्थेच्या सर्व पदाधिकाऱ्यांचे पालकांकडून अभिनंदन व विशेष प्रशंसा करण्यात येत आहे.
