प्रतिनिधी :
लेखक चंदू राठोड यांनी आपल्या जीवनातील संघर्ष, कष्ट आणि आर्थिक स्वावलंबनाचा प्रवास अत्यंत प्रभावीपणे मांडलेले आत्मकथन “जांगड” सध्या वाचकांचे लक्ष वेधून घेत आहे. कष्ट, जिद्द आणि संघर्षातून उभ्या राहिलेल्या जीवनप्रवासाचे वास्तव दर्शन घडविणारे हे आत्मकथन वाचकांना अंतर्मुख करणारे ठरत आहे.
स्वतःला आणि कुटुंबाला आर्थिक स्थैर्य, सामाजिक प्रतिष्ठा आणि संपन्नता मिळवून देण्यासाठी लेखकाने केलेल्या अथक परिश्रमांचा आलेख या पुस्तकात रेखाटण्यात आला आहे. पणजोबा, आजोबा, वडील यांच्यापासून स्वतः आजोबा होईपर्यंतच्या आयुष्यातील विविध टप्प्यांचे अनुभव लेखकाने अत्यंत जिवंत शैलीत मांडले आहेत.
लेखकाने आपल्या गाव-तांड्यातील प्रेमळ, सहकार्य करणारे आणि सुख-दुःखात सहभागी होणाऱ्या माणसांचे चित्रण हळुवार शैलीत केले आहे. त्याचबरोबर समाजातील आपमतलबी, व्यसनी, अंधश्रद्धाळू, कपटी आणि दुराचारी प्रवृत्तीवरही भाष्य करत वास्तववादी मांडणी केली आहे.
या आत्मकथनाला डॉ. युवराज पवार यांनी विस्तृत प्रस्तावना लिहिली असून डॉ. सुभाष राठोड यांनी समर्थ पाठराखण केली आहे. त्यामुळे पुस्तकाची साहित्यिक उंची अधिक प्रभावी बनली आहे.
“जांगड” या आत्मकथनात विदर्भ-मराठवाडा सीमाभागातील दारव्हा, दिग्रस, आर्णी, पुसद, माहूर, किनवट, मांडवी, सारखानी, लालूनाईक तांडा अशा अनेक गाव-तांड्यांचे सामाजिक, सांस्कृतिक आणि भौगोलिक वास्तव उलगडण्यात आले आहे. ग्रामसंस्कृती, जत्रा, यात्रांचा उत्साह, लोककला, नाटक, एकांकिका, शेती-माती आणि ग्रामीण जीवनाचे दर्शन लेखकाने जिवंत शब्दांत घडविले आहे.
शिक्षणातील अपुऱ्या सुविधा, वसतिगृहातील हालअपेष्टा, शेतीची कामे, जनावरांची राखण अशा अनेक संकटांवर मात करत लेखकाने स्वतःच्या कलागुणांना वाव दिला. अभिनय आणि कलेची आवड जोपासत स्वतःचे कला मंडळ स्थापन करून त्यांनी आयुष्याला नवी दिशा दिली.
जीवनातील संकटांचा सामना करत आर्थिक स्वावलंबनाचे चक्र फिरवून संसाराला स्थैर्य आणि आनंद देणाऱ्या या संघर्षमय प्रवासामुळे “जांगड” हे आत्मकथन वाचनीय आणि प्रेरणादायी ठरले आहे.
पुस्तकाची माहिती :
- आत्मकथनाचे नाव : “जांगड”
- लेखक : चंदू डोमा राठोड
- प्रकाशक : स्वयं प्रकाशन, पुणे
- एकूण पृष्ठे : २२४
- पुस्तक मूल्य : २७० रुपये
- संपर्क : ९०४९२२०४९०
