एकाच छताखाली २८ विभागांच्या योजनांचा लाभ; २३४० लाभार्थ्यांना प्रत्यक्ष सेवा
केळापूर प्रतिनिधी :
पाटणबोरी येथे दिनांक ८ मे २०२६ रोजी महाराष्ट्र शासनाच्या जनकल्याणकारी योजनांचा लाभ थेट नागरिकांपर्यंत पोहोचवण्यासाठी आयोजित करण्यात आलेले ‘छत्रपती शिवाजी महाराज महसूल समाधान शिबिर’ उत्साहात संपन्न झाले. या शिबिराला परिसरातील नागरिकांनी उत्स्फूर्त प्रतिसाद देत मोठ्या संख्येने उपस्थिती दर्शविली.
या शिबिरासाठी एकूण २६४८ नागरिकांनी उपस्थिती लावली होती. विविध २८ शासकीय विभागांमार्फत नागरिकांना योजनांची माहिती तसेच विविध सेवांचा लाभ देण्यात आला. शिबिरादरम्यान २३४० लाभार्थ्यांना विविध दाखले, योजना व लाभांचे वितरण करण्यात आले.
कार्यक्रमात जिल्हा परिषद शाळेतील विद्यार्थ्यांनी सांस्कृतिक कार्यक्रम सादर करून उपस्थितांची मने जिंकली. पाटणबोरी हे गाव तेलंगणा सीमेजवळ असल्याने विद्यार्थ्यांनी सादर केलेल्या तेलगू गाण्यावरील नृत्याला विशेष दाद मिळाली.
तालुका आरोग्य अधिकारी डॉ. संजय मडावी यांनी HPV लस व क्षयरोग (TB) विषयावर मार्गदर्शन केले. यावेळी गरोदर मातांना ‘बाल सुरक्षा किट’ वाटप करण्यात आले.
पशुवैद्यकीय अधिकारी श्री. प्रशांत पायघन यांनी ग्रामीण पशुधन योजना व शेतीपूरक व्यवसायांबाबत माहिती दिली. तसेच शेतकरी आत्महत्याग्रस्त कुटुंबाला सेवानिवृत्त मुख्याध्यापक श्री. विजय भागाननगरकर यांच्या हस्ते कृषी पंपाचे वाटप करण्यात आले.
महिला बचत गटांना बँकेमार्फत प्रति गट १ लाख ५० हजार रुपये गटसाहाय्य निधी देण्यात आला. तसेच भारतीय स्टेट बँक, पाटणबोरी शाखेच्या वतीने लाभार्थ्यांना पिककर्ज वाटप करण्यात आले.
दिल्ली येथे प्रजासत्ताक दिनानिमित्त आयोजित ‘कर्तव्य पथ’ कार्यक्रमात सलग ४ ते ५ वर्षे सहभाग नोंदवणारे मूर्तीकार श्री. यशवंत एनगुर्तीवार यांचा विशेष सत्कार करण्यात आला. यवतमाळ जिल्ह्यातील एकमेव अंधारवाडी मध संकलन केंद्राचा स्टॉल शिबिरात आकर्षणाचे केंद्र ठरला.
या शिबिरामुळे ग्रामीण भागातील नागरिकांना विविध शासकीय सेवा आणि योजनांचा लाभ एकाच ठिकाणी मिळाल्याने मोठा दिलासा मिळाला आहे. कार्यक्रम यशस्वी करण्यासाठी अनिल पुल्लजवार, अनिल गुंडेवार, विनोद निम्मलवार यांनी विशेष सहकार्य केले.
कार्यक्रमाच्या अध्यक्षस्थानी सरपंच सौ. दिपाली सुरावार होत्या. प्रमुख उपस्थितीमध्ये उपजिल्हाधिकारी अमोल एलगट्टे, तहसीलदार राजेंद्र इंगळे तसेच विविध विभागांचे अधिकारी उपस्थित होते.
कार्यक्रमाचे सूत्रसंचालन सौ. अंजली नालमवार यांनी केले तर प्रास्ताविक व आभार प्रदर्शन नायब तहसीलदार श्री. राजू मोट्टेमवार यांनी केले.
यावेळी मंडळ अधिकारी श्री. एम. के. कुळसंगे, ग्राम महसूल अधिकारी श्री. टेकाम, श्री. धुंड्रॉवार, श्री. पवार, श्री. नैताम, श्री. कनाके, सविता मरापे तसेच महसूल सेवक सुजाता निम्मलवार, कोंडावार, पेंदोर, रामगिरवार यांनी शिबिराच्या यशस्वी आयोजनासाठी योगदान दिले.
