पुणे / प्रतिनिधी
शिरूर शहरातील वाढती लोकसंख्या, दाट वस्त्या आणि विविध आपत्कालीन परिस्थिती लक्षात घेऊन शिरूर नगरपरिषदेच्या अग्निशमन व बचाव व्यवस्थेत महत्त्वाची भर घालण्यात आली आहे. शिरूर-हवेलीचे आमदार ज्ञानेश्वर (माऊली) आबा कटके यांच्या विशेष प्रयत्नातून नगरपरिषदेच्या ताफ्यात अत्याधुनिक सुविधांनी सुसज्ज असे नवीन ‘मिनी रेस्क्यू टेंडर’ दाखल झाले असून त्यामुळे शहरातील आपत्कालीन सेवा अधिक गतिमान आणि प्रभावी होणार आहेत.
अरुंद रस्ते, दाट लोकवस्ती तसेच तातडीने मदतीची आवश्यकता असलेल्या भागांमध्ये हे वाहन विशेष उपयुक्त ठरणार आहे. आग, अपघात, नैसर्गिक आपत्ती तसेच विविध बचाव मोहिमांमध्ये या वाहनाचा प्रभावी वापर होणार असल्याचे नगर परिषद प्रशासनाकडून सांगण्यात आले.
या अत्याधुनिक मिनी रेस्क्यू टेंडरमध्ये अपघातग्रस्त वाहनांमध्ये अडकलेल्या व्यक्तींना सुरक्षित बाहेर काढण्यासाठी कटर आणि स्प्रेडरसारखी आधुनिक उपकरणे उपलब्ध करून देण्यात आली आहेत. तसेच प्रथमोपचार किट, उच्च दाबाचा पाण्याचा पंप आणि होज रील यांचाही समावेश करण्यात आला आहे. पेट्रोल, डिझेल किंवा रासायनिक पदार्थांमुळे लागलेल्या आगीवर नियंत्रण मिळवण्यासाठी ही यंत्रणा प्रभावी ठरणार आहे.
रात्रीच्या वेळी शोध व बचावकार्य अधिक परिणामकारकपणे पार पाडण्यासाठी वाहनात हाय-इंटेंसिटी लाइट्सची विशेष प्रकाश व्यवस्था करण्यात आली आहे. त्यामुळे अंधारातही बचाव पथकांना तातडीने आणि सुरक्षितरीत्या काम करणे शक्य होणार आहे.
आमदार ज्ञानेश्वर (माऊली) आबा कटके यांनी सांगितले की, “शहराच्या वाढत्या व्याप्तीबरोबर आधुनिक आपत्कालीन सुविधा उपलब्ध करून देणे आवश्यक होते. नागरिकांच्या सुरक्षिततेसाठी हे अत्याधुनिक मिनी रेस्क्यू टेंडर महत्त्वाची भूमिका बजावेल.”
नगराध्यक्षा ऐश्वर्या अभिजीत पाचर्णे म्हणाल्या की, “शहरातील नागरिकांची सुरक्षितता ही नगरपरिषदेची सर्वोच्च प्राथमिकता आहे. नव्याने दाखल झालेले हे वाहन जीवित व मालमत्तेचे नुकसान कमी करण्यासाठी उपयुक्त ठरेल.”
या वाहनाचे लोकार्पण नगराध्यक्षा ऐश्वर्या पाचर्णे यांच्या हस्ते करण्यात आले. यावेळी उपनगराध्यक्ष मितेश गादिया, सभापती सुनील जाधव, एजाज बागवान, आयेशा सय्यद, स्वाती साठे, नगरसेविका संगीता मल्लाव, चारुशिला कोळपकर, स्वप्नाली जामदार, नगरसेवक अभिजित पाचर्णे, सागर नरवडे, निलेश गाडेकर, संतोष थेऊरकर तसेच प्रशासकीय अधिकारी राहुल पिसाळ, सचिन वाळूंज, अग्निशमन अधिकारी महेश कदम आदी उपस्थित होते.
