नाशिक | प्रतिनिधी
सिंहस्थ कुंभमेळ्याच्या पार्श्वभूमीवर नाशिक शहरातील वाहतूक कोंडी सोडवण्यासाठी महत्त्वाच्या मानल्या जाणाऱ्या द्वारका सर्कल ते नाशिकरोड दहापदरी रस्ता रुंदीकरण प्रकल्पाला राष्ट्रीय महामार्ग प्राधिकरणाने (NHAI) अंतिम मंजुरी दिली आहे. या प्रकल्पासाठी तब्बल २२० कोटी रुपयांचा खर्च मंजूर करण्यात आला असून, या महिनाअखेरीस प्रत्यक्ष कामाला सुरुवात होण्याची शक्यता आहे.
द्वारका सर्कल ते दत्त मंदिर या सुमारे ६.४ किलोमीटर अंतराच्या रस्त्याचे रुंदीकरण करण्यात येणार आहे. प्रकल्प पूर्ण झाल्यानंतर हा महामार्ग महापालिकेकडे हस्तांतरित करण्यात येणार असल्याची माहिती सूत्रांनी दिली.
नाशिक शहरातील द्वारका चौक हा अत्यंत महत्त्वाचा वाहतूक केंद्रबिंदू बनला असून, सिंहस्थ कुंभमेळ्याच्या पार्श्वभूमीवर येथे मोठ्या प्रमाणात वाहतुकीचा ताण वाढण्याची शक्यता आहे. सध्या द्वारका चौकातील वाहतूक कोंडी कमी करण्यासाठी अंडरपासचे काम सुरू आहे. मात्र, द्वारका ते दत्त मंदिर दरम्यान सतत निर्माण होणारी वाहतूक कोंडी नागरिकांसाठी मोठी डोकेदुखी ठरत आहे.
नाशिकरोडमार्गे सिन्नर, शिर्डी तसेच पुण्याकडे मोठ्या प्रमाणावर वाहनांची ये-जा होत असल्याने द्वारका चौक, बोधलेनगर, गांधीनगर, उपनगर आणि नेहरूनगर परिसरात दिवसभर वाहतुकीचा ताण निर्माण होतो. ही समस्या कायमस्वरूपी सोडवण्यासाठी भारतमाला योजनेअंतर्गत चार वर्षांपूर्वी द्वारका ते दत्त मंदिर उड्डाणपूल आणि रस्ता रुंदीकरणाचा प्रस्ताव मंजूर करण्यात आला होता.
आता न्हाईकडून अंतिम मंजुरी मिळाल्याने प्रकल्पाला गती मिळणार असून, भविष्यात नाशिकरोडवरील वाहतूक अधिक वेगवान आणि सुरळीत होण्याची अपेक्षा व्यक्त केली जात आहे.
