कन्नड प्रतिनिधी :
ताडपिंपळगाव परिसरात राष्ट्रपुरुष महाराणा प्रताप यांची जयंती आज ९ मे रोजी मोठ्या उत्साहात आणि भक्तिमय वातावरणात साजरी करण्यात आली. शौर्य, स्वाभिमान आणि राष्ट्रभक्तीचे प्रतीक असलेल्या महाराणा प्रताप यांच्या प्रतिमेला पुष्पहार अर्पण करून अभिवादन करण्यात आले.
या कार्यक्रमाला भाजप महाराष्ट्र प्रदेश कार्यकारिणी सदस्य तथा जिल्हा परिषद सदस्य प्रा. डॉ. संजय गव्हाणे यांची प्रमुख उपस्थिती लाभली. त्यांनी आपल्या मार्गदर्शनपर भाषणात महाराणा प्रताप यांच्या शौर्यगाथेचा उल्लेख करत आजच्या तरुण पिढीने त्यांचा आदर्श डोळ्यासमोर ठेवून कार्य करावे, असे आवाहन केले.
यावेळी माजी पत्रकार चत्तरसिंग महेर, उपसरपंच सतीश शेळके, कारभारी मुंजाळ, विवेक शेळके यांच्यासह अनेक मान्यवर उपस्थित होते. तसेच देशाच्या सीमेवर सेवा बजावणारे सतपालसिंग महेर आणि चेतनसिंग महेर यांच्या उपस्थितीने कार्यक्रमाला विशेष महत्त्व प्राप्त झाले. ग्रामस्थांनी त्यांचा गौरव करून कौतुक व्यक्त केले.
कार्यक्रमाच्या यशस्वी आयोजनासाठी गावातील युवक, ग्रामस्थ आणि बालगोपाळांनी विशेष मेहनत घेतली. ढोल-ताशांच्या गजरात आणि “जय भवानी, जय शिवाजी”, “महाराणा प्रताप की जय” अशा घोषणांनी संपूर्ण परिसर दुमदुमून गेला होता.
कार्यक्रमात मोठ्या संख्येने नागरिक सहभागी झाले होते. सामाजिक ऐक्य आणि इतिहासप्रेम जपणारा हा सोहळा उत्साहपूर्ण वातावरणात संपन्न झाला.
