अत्यंत कमी वयात मुंबईत अभिनय क्षेत्रात यश; दोंडाईचा शहरासाठी अभिमानाची बाब
दोंडाईचा : प्रतिनिधी
दोंडाईचा शहरातील नटराज डान्स स्टुडिओच्या माध्यमातून लहान मुलांना नृत्य प्रशिक्षण देणारे श्री. विक्की बाटुंगे यांच्या परिवारातील चिमुकली कु. विनीशा विकास बाटुंगे (वय ६) हिने अत्यंत कमी वयात मुंबई येथील फिल्म इंडस्ट्रीमध्ये आपली वेगळी ओळख निर्माण केली आहे.
कु. विनीशाने आतापर्यंत विविध वेब सीरिज, शॉर्ट फिल्म, तसेच Colors TV वरील लाफ्टर शोमध्ये काम केले आहे. याशिवाय Dangal TV वरील “प्रेम लीला” या मालिकेतही तिने भूमिका साकारली असून विविध टीव्ही जाहिरातींमधूनही ती झळकली आहे.
अल्पवयातच अभिनय आणि कला क्षेत्रात उल्लेखनीय कामगिरी करत असलेल्या विनीशाचे सर्व स्तरातून कौतुक होत आहे. तिच्या यशामुळे दोंडाईचा शहराच्या शिरपेचात मानाचा तुरा रोवला गेला असून शहरवासीयांकडून तिच्यावर शुभेच्छांचा वर्षाव होत आहे.
कु. विनीशा हिने भविष्यातही अभिनय क्षेत्रात उत्तुंग यश संपादन करून आपल्या शहराचे नाव उज्ज्वल करावे, अशा शुभेच्छा नागरिकांकडून व्यक्त करण्यात येत आहेत.
