नांदेड : लोहा येथील लग्न समारंभ आटोपून सहपरिवार परत येत असताना दि. २ मे रोजी नांदेड–लोहा मार्गावर झालेल्या भीषण अपघातात हस्तरा येथील अनिल चिलोरे हे गंभीर जखमी झाले असून त्यांच्या पत्नीला देखील मोठी दुखापत झाली आहे. दुचाकीला पाठीमागून भरधाव कारने जोरदार धडक दिल्याने हा अपघात झाला. ईश्वर कृपेने दोघांचेही प्राण वाचले आहेत.
अपघातानंतर अनिल चिलोरे यांच्यावर यशोसाई हॉस्पिटल, नांदेड येथे उपचार सुरू असून ते दि. २ मेपासून बेशुद्ध अवस्थेत आहेत. त्यांच्या डोक्याचे ऑपरेशन करण्यात आले असून प्रकृतीत हळूहळू सुधारणा होत असल्याची माहिती कुटुंबीयांनी दिली. त्यांच्या पत्नीवर रेणुका हॉस्पिटल, LIC चौक, नांदेड येथे उपचार सुरू असून कारने फरफटत नेल्यामुळे त्यांचा पाय मोडला आहे. त्यांच्या पायाचे ऑपरेशन करण्यात येणार आहे.
या दाम्पत्याच्या पाठीमागे दोन मुली व एक मुलगा असून उपचारासाठी मोठ्या प्रमाणात आर्थिक खर्च होत आहे. ही बाब लक्षात घेऊन त्यांच्या मित्रपरिवाराने मदतीचा हात पुढे केला आहे.
मागील शनिवारी गोदाजी सोनार व बालू गाडे यांनी रुग्णालयात भेट देऊन वैयक्तिक मदत केली होती. त्यानंतर गंगाराम पाटील हायस्कूल निवघा बाजार येथील दहावी 1996-97 बॅचच्या मित्रांनी ग्रुपमध्ये चर्चा करून आर्थिक मदत जमा करण्याचा निर्णय घेतला.
आज गोदाजी सोनार, संतोष शिंदे आणि बालू गाडे यांनी मिळून ₹५० हजारांची मदत अनिल चिलोरे यांचे भाऊ प्रदीप चिलोरे यांच्याकडे सुपूर्द केली. तसेच मित्रपरिवाराकडून एकूण ₹५५ हजारांची मदत जमा करण्यात आली.
“अशा कठीण प्रसंगी मदतीचा हात पुढे करणे हेच खरी मैत्री आणि सामाजिक बांधिलकी आहे,” अशी भावना मित्रपरिवाराने व्यक्त केली.
अनिल चिलोरे आणि त्यांच्या पत्नीने लवकर बरे व्हावे, अशी प्रार्थना सर्व स्तरातून व्यक्त होत आहे.
