आर्वी प्रतिनिधी :
पिपरी पुनर्वसन येथील अत्यंत सर्वसामान्य कुटुंबातील कु. कल्याणी नरेश तेटू हिने जिद्द, मेहनत आणि चिकाटीच्या जोरावर दहावीच्या परीक्षेत ९५ टक्के गुण मिळवत नोबेल किड्स स्कूलमध्ये प्रथम क्रमांक पटकाविला आहे. तिच्या या उल्लेखनीय यशामुळे परिसरात आनंदाचे वातावरण निर्माण झाले आहे.
आर्थिक परिस्थिती बेताची असतानाही कल्याणीने अभ्यासावर एकाग्रतेने लक्ष केंद्रित करत सातत्यपूर्ण मेहनत घेतली. आर्वी येथील प्रतिष्ठित आणि प्रस्थापित इंग्रजी माध्यमाच्या शाळेत श्रीमंत कुटुंबातील विद्यार्थ्यांमध्ये स्पर्धा करत तिने हे यश संपादन केले. तिच्या यशामागे मेहनत, जिद्द, संयम आणि चिकाटी या गुणांचा मोठा वाटा असल्याचे ग्रामस्थांनी सांगितले.
कल्याणीच्या या यशाबद्दल गावात उत्साहाचे वातावरण असून सरपंच राजेंद्र शिरगरे यांच्या हस्ते तिचा सत्कार करण्यात आला. यावेळी गावकरी, विद्यार्थी मित्र तसेच विविध मान्यवरांनी तिचे अभिनंदन करून पुढील शैक्षणिक वाटचालीस शुभेच्छा दिल्या.
सत्कार समारंभाला नरेश तेटू, शैलेश तलवारे, वसंत मंडवे, महेंद्र म्हात्रे, प्रशांत हेरोडे, रवींद्र खंडारे, राहुल काळे, धनराज भोवरे, कविता म्हात्रे, सविता दहाट, कविता शिरगरे, हर्षाताई देशमुख आदी उपस्थित होते.
