फुलसावंगी : प्रतिनिधी
स्थानिक ढाणकी रोडवरील एका कोल्ड्रिंक व पानटपरीच्या गोदामाला आज दुपारी सुमारे १२.३० वाजताच्या दरम्यान अचानक भीषण आग लागल्याची घटना घडली. आगीमुळे परिसरात काही काळ भीतीचे वातावरण निर्माण झाले होते.
आग लागल्यानंतर गोदामातून धुराचे मोठमोठे लोट बाहेर पडू लागल्याने नागरिकांनी तत्काळ घटनास्थळी धाव घेतली. हे ठिकाण वर्दळीच्या भागात असल्याने नागरिकांनी आग आटोक्यात आणण्यासाठी शर्थीचे प्रयत्न केले.
घटनेची माहिती मिळताच फुलसावंगीचे तलाठी विनोद ढोणे यांनी घटनास्थळी भेट देऊन महसूल प्रशासनाला माहिती दिली. तसेच उमरखेड येथून अग्निशमन दलाची गाडी पाचारण करण्यात आली.
सदर गोदाम जफर खान मेहबूब खान यांनी भाडेतत्त्वावर घेतले होते. गोदामामध्ये ठेवण्यात आलेले फ्रीज, इन्व्हर्टर, बिसलेरी पाण्याच्या बाटल्या, विविध कोल्ड्रिंक्स तसेच इतर साहित्य आगीत पूर्णतः जळून खाक झाले. या घटनेत लाखो रुपयांचे नुकसान झाल्याचा प्राथमिक अंदाज व्यक्त करण्यात येत आहे.
स्थानिक नागरिकांनी वेळीच मदतकार्य केल्यामुळे आग अधिक पसरली नाही आणि मोठा अनर्थ टळला. सुदैवाने या दुर्घटनेत कोणतीही जीवितहानी झाली नाही.
दरम्यान, आग लागण्याचे नेमके कारण अद्याप समोर आले नसून संबंधित यंत्रणांकडून पुढील तपास सुरू आहे.
