साक्री / प्रतिनिधी
धुळे जिल्ह्यातील साक्री तालुक्यात घडलेल्या दुहेरी हत्याकांडामुळे संपूर्ण परिसरात खळबळ उडाली आहे. वर्धाने आणि उभारंडी शिवारात दोन वेगवेगळ्या ठिकाणी मृतदेह आढळून आल्याने तालुका हादरून गेला. घटनेची माहिती मिळताच निजामपूर पोलीस घटनास्थळी दाखल झाले. श्वान पथक आणि फॉरेन्सिक टीमच्या मदतीने पोलिसांनी अवघ्या २४ तासांत या गुन्ह्याचा उलगडा केला.
मिळालेल्या माहितीनुसार, टेंभे फाट्याजवळ एका विवाहित महिलेचा मृतदेह आढळून आला. तिच्या अंगावर अॅक्सेस दुचाकी टाकण्यात आली होती. मृत महिलेची ओळख जयश्री काकूंस्ते अशी पटली. या घटनेचा तपास सुरू असतानाच आरोपीकडून आणखी एका खुनाचा उलगडा झाला.
अक्षय सोनावणे नामक युवकाची हत्या करून त्याचा मृतदेह उभारंडी शिवारातील टेकडीवर पुरल्याची माहिती आरोपीने पोलिसांना दिली. त्यानंतर पोलिसांनी घटनास्थळी जाऊन मृतदेह बाहेर काढला.
या दुहेरी हत्याकांडामुळे साक्री तालुक्यात भीतीचे वातावरण निर्माण झाले असून, पोलिसांकडून पुढील तपास सुरू आहे.
