प्रतिनिधी | नाशिक
राज्य शासनाच्या गृह विभागाने महाराष्ट्र पोलिस दलात मोठ्या प्रमाणावर वरिष्ठ आयपीएस अधिकाऱ्यांच्या बदल्या व पदोन्नतीचे आदेश जारी केले आहेत. या फेरबदलामध्ये नाशिक परिक्षेत्राशी संबंधित महत्त्वाच्या अधिकाऱ्यांचाही समावेश असून, प्रशासकीय वर्तुळात याची मोठी चर्चा सुरू आहे.
विशेष पोलिस महानिरीक्षक, नाशिक परिक्षेत्र म्हणून कार्यरत असलेले दत्ता कराळे यांची राज्य मानवी हक्क आयोगात विशेष पोलिस महानिरीक्षक पदावर बदली करण्यात आली आहे. त्यांच्या जागी आता प्रवीण पडवळ यांच्याकडे नाशिक परिक्षेत्राची जबाबदारी सोपविण्यात आली आहे.
तसेच राज्यभरातील विविध विभागांमध्येही वरिष्ठ अधिकाऱ्यांच्या बदल्या करण्यात आल्या आहेत. त्यामध्ये संजय चेडुपुरे यांची विशेष पोलिस महानिरीक्षक, व्हीआयपी सुरक्षा विभाग येथे नियुक्ती करण्यात आली आहे. ज्योती प्रिय सिंग यांच्याकडे अमली पदार्थ विरोधी पथकाची जबाबदारी देण्यात आली आहे.
याशिवाय संजय जाधव यांची अपर पोलिस आयुक्त, ठाणे म्हणून नियुक्ती करण्यात आली असून, अनिल कुंभारे यांची पोलिस सहआयुक्त (गुन्हे), मुंबई येथे बदली करण्यात आली आहे. दीपक सावकोरे यांच्याकडे नवी मुंबई पोलिस सहआयुक्त पदाची जबाबदारी देण्यात आली असून, सत्य नारायण चौधरी यांची वाहतूक विभाग, मुंबई येथे पोलिस सहआयुक्त म्हणून नियुक्ती करण्यात आली आहे.
दरम्यान, दत्ता कराळे यांच्या कार्यकाळात काही संवेदनशील प्रकरणांमध्ये झालेल्या कारवाईमुळे त्यांच्या बदलीची चर्चा रंगली होती. या फेरबदलामुळे नाशिक पोलिस दलाच्या कार्यपद्धतीत बदल होण्याची शक्यता व्यक्त केली जात आहे.
