पुणे शहरात अपर पोलीस आयुक्त (गुन्हे) पदाची जबाबदारी
राज्य सरकारच्या मोठ्या प्रशासकीय फेरबदलाची सर्वत्र चर्चा
प्रतिनिधी :: मुंबई :
मुख्यमंत्री देवेंद्र फडणवीस यांच्या नेतृत्वाखालील महायुती सरकारने राज्यातील पोलीस प्रशासनात मोठे फेरबदल करत तब्बल ५२ आयपीएस अधिकारी आणि ४४ राज्य पोलीस दलातील अधिकाऱ्यांच्या बदल्या केल्या आहेत. या मोठ्या बदल्यांमध्ये अशोक खरात प्रकरणाच्या तपासासाठी स्थापन करण्यात आलेल्या विशेष तपास पथकाच्या (SIT) प्रमुख तेजस्वी सातपुते यांचीही बदली करण्यात आली आहे.
तेजस्वी सातपुते या आतापर्यंत संवेदनशील आणि चर्चेत असलेल्या अशोक खरात प्रकरणाच्या तपासाची जबाबदारी सांभाळत होत्या. त्यांच्या नेतृत्वाखाली SIT कडून विविध पुरावे, आर्थिक व्यवहार, तसेच संबंधित व्यक्तींची चौकशी सुरू होती. तपास प्रक्रियेत काही महत्त्वाच्या घडामोडी घडत असतानाच त्यांच्या बदलीचा आदेश आल्याने प्रशासकीय वर्तुळात चर्चांना उधाण आले आहे.
राज्य सरकारने सातपुते यांची पुणे शहरात अपर पोलीस आयुक्त (गुन्हे) या महत्त्वाच्या पदावर नियुक्ती केली आहे. पुणे शहरातील वाढत्या गुन्हेगारी घटनांवर नियंत्रण आणणे, सायबर गुन्हे, आर्थिक फसवणूक, संघटित गुन्हेगारी आणि गंभीर स्वरूपाच्या गुन्ह्यांवर कारवाई करण्याची मोठी जबाबदारी आता त्यांच्यावर असणार आहे.
दरम्यान, अशोक खरात प्रकरणाचा तपास आता नव्या अधिकाऱ्यांकडे सोपवला जाणार असल्याची माहिती सूत्रांकडून मिळत आहे. तपासाची दिशा बदलणार का, तसेच प्रकरणात नवीन खुलासे होणार का याकडे सर्वांचे लक्ष लागले आहे.
राज्य सरकारने केलेल्या या व्यापक बदल्यांमुळे पोलीस विभागात मोठ्या प्रमाणावर हालचाली सुरू झाल्या असून, अनेक वरिष्ठ अधिकाऱ्यांना नवीन जबाबदाऱ्या देण्यात आल्या आहेत. आगामी स्थानिक स्वराज्य संस्था निवडणुका, कायदा व सुव्यवस्था आणि संवेदनशील प्रकरणांच्या पार्श्वभूमीवर हे फेरबदल महत्त्वाचे मानले जात आहेत.
राजकीय वर्तुळातही या बदल्यांवर विविध प्रतिक्रिया उमटत असून, विरोधकांनी काही बदल्यांवर प्रश्नचिन्ह उपस्थित केले आहे. तर सरकारकडून मात्र या बदल्या पूर्णपणे प्रशासकीय कारणास्तव करण्यात आल्याचे स्पष्ट करण्यात आले आहे.
