शाफकत अमाना (मंडम) यांची पुणे CID मध्ये बदली
राज्य शासनाच्या पोलीस विभागातील बदल्यांना वेग
प्रतिनिधी :: धाराशिव :
राज्य शासनाने पोलीस विभागात मोठे प्रशासकीय फेरबदल करत विविध वरिष्ठ अधिकाऱ्यांच्या बदल्या जाहीर केल्या आहेत. या बदल्यांमध्ये बीड येथे कार्यरत असलेले अधिकारी सचिन पांडकर यांची धाराशिवच्या अपर पोलीस अधीक्षकपदी नियुक्ती करण्यात आली आहे.
तर सध्या धाराशिव येथे अपर पोलीस अधीक्षक म्हणून कार्यरत असलेले शाफकत अमाना (मंडम) यांची बदली पोलीस अधीक्षक, गुन्हे अन्वेषण विभाग (CID), पुणे येथे करण्यात आली आहे.
सचिन पांडकर यांनी बीड जिल्ह्यात कार्यरत असताना कायदा व सुव्यवस्था राखणे, गुन्हेगारी नियंत्रण तसेच संवेदनशील प्रकरणांच्या तपासात महत्त्वाची भूमिका बजावली होती. बीडमधील विविध गुन्हेगारीविरोधी मोहिमा, अवैध धंद्यांवर कारवाई तसेच निवडणुकांच्या पार्श्वभूमीवर शांतता राखण्यासाठी त्यांनी प्रभावी कामगिरी केली होती.
याशिवाय राष्ट्रीय महामार्ग जमीन संपादन घोटाळा प्रकरणाच्या विशेष तपास पथकाचे (SIT) नेतृत्वही त्यांनी केले होते. त्यांच्या नेतृत्वाखाली अनेक महत्त्वाचे पुरावे समोर आले होते. त्यामुळे त्यांची धाराशिव येथे झालेली नियुक्ती महत्त्वाची मानली जात आहे.
दरम्यान, शाफकत अमाना यांनी धाराशिव जिल्ह्यात कार्यरत असताना अनेक गुन्हे उघडकीस आणले होते. संघटित गुन्हेगारी, अवैध वाळू तस्करी, मटका व इतर अवैध धंद्यांवर त्यांनी कठोर कारवाई केली होती. त्यांच्या बदलीमुळे पोलीस विभागात चर्चांना उधाण आले आहे.
राज्य शासनाने केलेल्या या बदल्यांमुळे आगामी काळात पोलीस प्रशासन अधिक गतिमान होणार असल्याची चर्चा सुरू आहे.
