संजय दराडे पुण्याचे नवे सहपोलीस आयुक्त
तेजस्वी सातपुते यांच्याकडे गुन्हे शाखेच्या अतिरिक्त आयुक्तपदाची जबाबदारी
प्रतिनिधी :: पुणे :
राज्यातील वरिष्ठ आयपीएस अधिकाऱ्यांच्या बदल्यांचे आदेश राज्य शासनाने जारी केले असून पुणे शहर पोलीस आयुक्तालयात मोठे फेरबदल करण्यात आले आहेत. या बदल्यांमुळे पोलीस दलात नव्या जबाबदाऱ्यांचे वाटप करण्यात आले असून अनुभवी अधिकाऱ्यांवर महत्त्वाची पदे सोपवण्यात आली आहेत.
पुणे शहर पोलीस आयुक्तालयाचे सहपोलीस आयुक्त रंजनकुमार शर्मा यांची कोल्हापूर परिक्षेत्राच्या विशेष पोलीस महानिरीक्षकपदी बदली करण्यात आली आहे. त्यांच्या जागी कोकण परिक्षेत्राचे विशेष पोलीस महानिरीक्षक संजय दराडे यांची पुणे शहरात सहपोलीस आयुक्त म्हणून नियुक्ती करण्यात आली आहे.
तसेच पुणे शहर गुन्हे शाखेचे अतिरिक्त पोलीस आयुक्त पंकज देशमुख यांच्या जागी राज्य राखीव पोलीस बलातील गट क्रमांक एकच्या समादेशक तेजस्वी सातपुते यांची बदली करण्यात आली आहे. संवेदनशील तपास आणि प्रशासकीय कामकाजातील अनुभव लक्षात घेऊन त्यांच्यावर ही जबाबदारी सोपवण्यात आल्याची माहिती सूत्रांकडून मिळत आहे.
दरम्यान, कोल्हापूर परिक्षेत्राचे विशेष पोलीस महानिरीक्षक सुनील फुलारी यांची राज्य गुन्हे अन्वेषण विभागात (CID) बदली करण्यात आली आहे. तसेच जिंतूर येथे सहाय्यक पोलीस अधीक्षक म्हणून कार्यरत असलेले जीवन देवाशीष बेनिवाल यांची पुणे शहर पोलीस दलात उपायुक्त म्हणून नियुक्ती करण्यात आली आहे.
अचलपूर येथील सहाय्यक पोलीस अधीक्षक शुभम कुमार यांची पुणे ग्रामीणच्या अतिरिक्त अधीक्षकपदी बदली करण्यात आली असून ठाणे पोलीस आयुक्तालयातील अतिरिक्त आयुक्त एस. व्ही. पाठक यांची पुणे शहर राज्य अन्वेषण विभागात नियुक्ती करण्यात आली आहे.
याशिवाय राज्य गुन्हे अन्वेषण विभागात अधीक्षक पदावर कार्यरत असलेले एमसीडी महेश रेड्डी यांची सीआयडीमध्ये उपमहानिरीक्षक पदावर पदोन्नतीने बदली करण्यात आली आहे.
राज्य शासनाने केलेल्या या बदल्यांमुळे पुणे शहर पोलीस दलात नवीन ऊर्जा निर्माण होणार असल्याची चर्चा असून गुन्हेगारी नियंत्रण, कायदा व सुव्यवस्था तसेच संवेदनशील प्रकरणांच्या तपासात अधिक गती येण्याची अपेक्षा व्यक्त केली जात आहे.
