शहादा, दि. १६
भारतीय जनता पार्टीच्या वतीने देशभरात राबविण्यात येत असलेल्या पंडित दीनदयाळ उपाध्याय प्रशिक्षण महाभियान अंतर्गत शहादा शहर व नंदुरबार जिल्हास्तरीय प्रशिक्षण वर्गाचे आयोजन करण्यात आले होते. हा कार्यक्रम शहादा येथील व्हीएसएस लॉन्स येथे उत्साहपूर्ण वातावरणात पार पडला.
प्रशिक्षण वर्गादरम्यान प्रमुख अतिथी आणि मार्गदर्शकांनी उपस्थित भाजपा पदाधिकारी व कार्यकर्त्यांशी थेट संवाद साधत पक्ष संघटन अधिक बळकट करण्यावर भर दिला. राष्ट्रहित, लोककल्याणकारी विचारधारा आणि भाजपा परिवाराची विकासाभिमुख कार्यशैली समाजाच्या तळागाळापर्यंत पोहोचविण्याचे आवाहन यावेळी करण्यात आले.
कार्यकर्त्यांमध्ये राष्ट्रभक्ती आणि राष्ट्रीयत्वाची भावना अधिक दृढ व्हावी, तसेच समाजहितासाठी कार्य करताना पक्षाच्या विचारसरणीचा प्रभावीपणे प्रसार व्हावा, याबाबत सविस्तर मार्गदर्शन करण्यात आले.
या कार्यक्रमास आमदार राजेश पाडवी, शहादा नगरपरिषदेच्या उपनगराध्यक्षा सौ. माधवी मकरंद पाटील, भाजपाचे जिल्हाध्यक्ष निलेश माळी, शहादा शहराध्यक्ष ज्ञानेश्वर चौधरी यांच्यासह जिल्ह्यातील आणि शहरातील भाजपा पदाधिकारी व कार्यकर्ते मोठ्या संख्येने उपस्थित होते.
